बॉलिवूड अभिनेते रणबीर कपूर (ranbir kapoor) आणि आलिया भट (alia bhatt) हे कपल सध्या चांगलेच चर्चेत आहेत. रणबीर आलिया ही जोडी चाहत्यांना खूप भावते. अद्याप या दोघांनीही त्यांच्या लग्नाविषयी कोणताही खुलासा केला नाही. परंतु त्यांच्या लग्नाबद्दल वारंवार बोलले जात आहे. यंदाच्या वर्षी ते विवाह बंधनात अडकतील अशी बातमी बॉलिवूड मधून मिळाल्याने चाहते त्यांच्या लग्नाची वाट पाहत आहेत. या बहुप्रतीक्षित लग्नाबाबत आता रोज नवी माहिती समोर येत आहे. हे लग्न एप्रिल महिन्यात होईल असा अंदाज काहींनी वर्तवला होता. अखेर त्यावर आता शिक्कामोर्तब होताना दिसते आहे.

एका माध्यमाने दिलेल्या माहितीनुसार, रणबीर आणि आलिया एप्रिलमध्ये म्हणजे या महिन्यात लग्न करणार आहेत, त्यासाठीचे ठिकाण देखील ठरलेले आहे. हे जोडपे एखाद्या भव्य हॉटेल किंवा डेस्टिनेशनवर जाऊन लग्न करणार नसून चक्क घरात लग्न करणार आहे. हे घर साधे सुधे नाही. कपूर घराण्याच्या वडिलोपार्जित घर असलेल्या आर.के. हाऊसमध्ये ते लग्न करणार आहेत. एका एंटरटेनमेंट पोर्टलने दावा केला आहे की हे लग्नाचे ठिकाण रणबीर कपूरनेच ठरवले आहे. विशेष म्हणजे रणबीरचे आई-वडील ऋषी कपूर आणि नीतू कपूर यांनीही २० जानेवारी १९८० मध्ये याच आर के हाऊसमध्ये लग्नगाठ बांधली होती.

'एप्रिलच्या दुसऱ्या आठवड्यात रणबीर आणि आलिया लग्नाच्या बेडीत अडकणार असून अंदाजे ४५० लोक या लग्नाला उपस्थित राहणार आहेत. हे लग्न एप्रिल अखेर व्हावे यासाठी कपूर घराणे उत्सुक होते परंतु आलियाचे आजोबा (आईचे वडील) नरेंद्रनाथ राजनाथ यांच्या प्रकृतीच्या कारणामुळे हे लग्न लवकर उरकले जात आहे.' अशी माहिती सूत्रांकडून मिळाली आहे.

नुकत्याच झालेल्या एका मुलाखतीत रणबीर कपूरनेही लग्नाच्या तारखेबाबत उत्तर दिले होते. माध्यमांशी बोलताना तो म्हणाला, 'माध्यमांसमोर तारीख जाहीर करायला मला काही वेड्या कुत्र्याने चावले नाही. सध्या मी तुम्हाला इतकंच सांगू शकतो की आलिया आणि मी दोघेही लग्न करण्याचा विचार करत आहोत. मला आशा आहे की ते लवकरच होईल.'