ज्या प्रेक्षकांना मोठ्या पडद्यावर राजामौलींचा 'RRR' पाहता आला नाही त्यांची सिनेमा पाहण्याची इच्छा लवकरच पूर्ण होणार आहे. एस.एस.राजामौली यांच्या RRR सिनेमानं बॉक्सऑफिसवर आपली जादू कायम ठेवलेली आहे. जगभरात या सिनेमानं बॉक्सऑफिसवर ८०० कोटींची कमाई केली आहे. ज्युनिअर एनटीआर(Jr.NTR),रामचरण(Ramcharan),आलिया भट्ट(Alia Bhatt),अजय देवगण(AJay Devgan) अशी तगडी स्टारकास्ट या सिनेमात आहे आणि त्या सर्वांनीच आपल्या अभिनयाची चांगलीच जादू चाहत्यांवर केली आहे. दुसऱ्या आठवड्यात देखील सिनेमा हाऊसफुल्ल झालेला दिसला. जे प्रेक्षकवर्ग सिनेमाला मोठ्या पडद्यावर पाहू शकले नाहीत ते मात्र सिनेमा ओटीटीवर केव्हा प्रदर्शित होणार याची चातकासारखी वाट पाहत आहेत. पण आता त्या साऱ्यांसाठी मोठी गूडन्यूज आलेली आहे,ज्यामुळे त्यांच्या मनातली इच्छा लवकरच पूर्ण होणार आहे.

हो.हे खरंय. लवकरच 'RRR' एकाच नाही तर चक्क दोन ओटीटी प्लॅटफॉर्मवर प्रदर्शित होणार आहे. हा सिनेमा प्रादेशिक भाषांमध्ये Zee5 वर पाहता येणार आहे. प्रदर्शनानंतर दोन महिन्यात सिनेमा Zee5 वर येईल. म्हणजेच २५ मे ला ओटीटीवर हिंदी सोडून इतर सर्व प्रादेशिक भाषांमध्ये सिनेमा प्रदर्शित होईल. तर हिंदी भाषेत मात्र हा सिनेमा अद्याप प्रदर्शित होणार नसल्याचं बोललं जात आहे. त्यामुळे या सिनेमाच्या हिंदी व्हर्जनची वाट पाहणाऱ्या प्रेक्षकांसाठी मात्र ही नाराज करणारी बातमी आहे.

'RRR' सिनेमाच्या निर्मात्यांनी अल्लु अर्जूनच्या 'पुष्पा द राइज'वरनं हा सिनेमा हिंदी भाषेत ओटीटीवर लवकर प्रदर्शित न करण्याचा निर्णय घेतला आहे. कारण 'RRR' सिनेमाचं हिंदी व्हर्जन अद्याप थिएटरमध्ये चांगलं सुरु आहे. सिनेमानं २०० करोडचा व्यवसाय केलेला आहे. म्हणून इतक्या लवकर हिंदीत हा सिनेमा ओटीटीवर प्रदर्शित करुन कोणतीही रिस्क निर्मात्यांना घ्यायची नाही. बातमी आहे की, RRR चं हिंदी व्हर्जन नेटफ्लिक्सवर प्रदर्शित केलं जाऊ शकतं. पण सिनेमाच्या मूळ प्रदर्शनानंतर तब्बल ३ महिन्यांनी ओटीटीवर हिंदी भाषेत तो प्रदर्शित होईल आणि प्रदर्शनाची तारिख असेल २५ जून. पण अद्याप जर-तर मध्ये ही तारिख अडकली आहे. RRR सिनेमातील VFX प्रेक्षकांच्या भलतेच पसंतीस उतरत आहे. सिनेमानं प्रदर्शनानंतर बॉक्सऑफिसचे सगळेच रेकॉर्ड तोडलेले पहायला मिळाले.