दिग्दर्शक नागराज पोपटराव मंजुळे यांनी मराठी चित्रपट विश्वात क्रांती घडवून आणली असं म्हणणं वावगं ठरणार नाही. कोण कुठला नागराज मंजुळे येतो आणि मराठी चित्रपटाचा चेहरा मोहरा बदलून टाकतो अशी अवस्था त्यांनी केलेल्या चित्रपटाने झाली. एका विशिष्ट धाटणीच्या, ठराविक कलाकरांना घेऊन केल्या जाणाऱ्या चोकोरीबध्द सिनेमाची चौकट मोडून त्यांनी 'पिस्तुल्या' आणला, मग 'फॅन्ड्री' आणि मग 'सैराट'...

समाजातील अंधारात असलेल्या घटकांना, विषयांना प्रकाशात आणण्याचा जाणून विडाच नागराज (nagraj manjule) यांनी उचलला आहे. नुकताच त्यांचा 'झुंड' हा चित्रपट घेऊन गेला. या चित्रपटाद्वारेही त्यांनी झोपडपट्टीतील मुलं काय करू शकतात याचं दर्शन घडवलं. पण नागराज यांच्या यशाची खरी जर्नी सैराट पासून सुरु झाली. कारण या चित्रपटाने सर्व रेकॉर्ड मोडून नवा इतिहास घडवला, केवळ राष्ट्रीय पुरस्कार जिंकले नाही तर १०० कोटींचा टप्पाही पार केला. १०० कोटी पार करणारा 'सैराट' हा पहिला मराठी चित्रपट ठरला.

सैराट २९ एप्रिल २०१६ (sairat) ला रिलीज झाला. आज या चित्रपटाला ६ वर्षे पूर्ण झाली असून आपली सर्वांची लाडकी आर्ची म्हणजे रिंकू राजगुरूने (rinku rajguru) याचे स्मरण करून दिले आहे. या चित्रपटात रिंकू राजगुरू आणि आकाश ठोसर (akash thosar) यांच्या प्रमुख भूमिका होत्या. आर्ची आणि परशा अशी त्यांची जोडी आजही प्रेक्षक विसरलेले नाहीत. ग्रामीण भागातील सरंजामशाही, जातीय तेढ आणि आंतरजातीय विवाहातील संघर्ष आणि अचूक आणि मार्मिकपणे या चित्रपटाने मांडला.

या चित्रपटाची क्रेझ अजूनही कमी झालेली नाही. कारण रिंकूने आज सैराटला ६ वर्षे पूर्ण झाल्याचे सांगताच चाहत्यांनी प्रतिक्रियांचा पाऊस पडला. रिंकूने चित्रपटातील एका सिनमधील फोटो शेअर केला आहे. ज्यामध्ये रिंकू, आकाश ठोसर, तानाजी गालगुंड, अरबाज शेख दिसत आहेत. हा चित्रपट बॉक्स ऑफिसवर तुफान चालला होता. या चित्रपटानं त्यावेळी ११० कोटींची कमाई केली होती.