वडीगोद्री (जालना) : अंबड तालुक्यातील अंतरवाली सराटी येथे मराठा आरक्षणासाठी (शनिवार, ता. दोन) उपोषण (Maratha Andolan) सुरू आहे. राज्य शासनाने आरक्षण (Jalna Maratha Reservation) जाहीर केल्याशिवाय उपोषण मागे न घेण्याचा निर्धार मुख्य उपोषणकर्ते मनोज जरांगे व त्यांच्या सहकाऱ्यांनी केला आहे.

आज विविध राजकीय नेते भेट देणार आहेत. दरम्यान, संभाजीराजे छत्रपती यांनी आज भेट देऊन आंदोलकांशी चर्चा केली. अंतरवाली सराटी येथे शुक्रवारी पोलिस आणि आंदोलकांमध्ये मोठा वाद झाला. या वादातून पोलिसांकडून लाठीचार्ज आणि अश्रूधुराचा मारा करण्यात आला.

त्यानंतर संतप्त जमावाने पोलिसांवर दगडफेक केली. शिवाय, पोलिसांनी प्लास्टिक बुलेटचा गोळीबारही केला. या घटनेचे संपूर्ण राज्यात प्रसाद उमटले असून शनिवारी अंतरवाली सराटी येथे मराठा आरक्षणासाठी उपोषण सुरू आहे. शुक्रवारी पहाटे अडीच वाजताच्या सुमारास राष्ट्रवादी काँग्रेसचे आमदार रोहित पवार यांनी उपोषण स्थळी भेट दिली.

तर, आज शनिवारी (ता. दोन) सकाळी संभाजीराजे छत्रपती यांनी ही उपोषण स्थळी भेट देऊन आंदोलकांशी चर्चा केली. शिवाय राष्ट्रवादी काँग्रेसचे अध्यक्ष शरद पवार हे देखील शनिवारी दुपारी आंदोलन भेट देणार आहेत.

दरम्यान, शासनाने आरक्षण जाहीर केल्याशिवाय उपोषण मागे घेतले जाणार नसल्याची भूमिका आंदोलनकर्त्यांनी घेतली आहे, असे उपोषणकर्ते मनोज जरांगे यांनी सांगितले. पोलिसांनी केलेल्या हल्ल्याचा व मुख्यमंत्री एकनाथ शिंदे यांचा निषेध जरांगे यांनी यावेळी केला. दरम्यान, उपोषण स्थळी परभणीचे खासदार संजय जाधव यांनी भेट दिली.