औरंगाबाद : पेटीएमचे केवायसी करण्याची थाप मारुन ज्येष्ठ महिलेला सुरुवातीला दहा रुपये ऑनलाईन भरायचे सांगितले, त्यानंतर सातवेळा ट्रान्जेक्शन करुन भामट्याने ५० हजार ६४४ रुपये हडपल्याचा प्रकार उघडकीस आला. 

मराठवाड्यातील अन्य बातम्या वाचण्यासाठी यावर क्लिक करा..!

पोलिसांकडून प्राप्त माहितीनुसार, हेमलता श्रीकांत कुलकर्णी (वय ६२, रा. एन-४, सिडको) यांना ३० जुलैला सायंकाळी साडेचारच्या सुमारास भामट्याने मोबाईलवर संपर्क केला. त्यावेळी त्यांना पेटीएमच्या केवायसी विभागातून बोलत असल्याचे सांगत पेटीएम कार्यान्वित करण्याबाबत विचारले. तेव्हा कुलकर्णी यांनी ‘‘यापुर्वी पेटीएम सुरु करण्याचा प्रयत्न केला. पण पेटीएम सुरू होत नव्हते.’ असे सांगत त्यांनी भामट्याला पेटीएम सुरु करण्यासंदर्भात सांगितले. पेटीएम सुरु करण्यासाठी सुरुवातीला दहा रुपये खात्यात भरावे लागतील असेही म्हणाला. यावर विश्‍वास ठेवत हेमलता कुलकर्णी यांनी भामट्याने सांगितल्यानुसार पेटीएमची प्रक्रिया सुरु केली. प्रक्रिया पार पाडत असतानाच कुलकर्णी यांच्या मोबाईलवर एक ओटीपी क्रमांक आला. हा ओटीपी क्रमांक त्यांनी पेटीएमव्दारे दहा रुपये भरण्यासाठी अ‍ॅप्लीकेशन मध्ये टाकला.

औरंगाबाद जिल्ह्यातील महत्त्वाच्या बातम्या वाचण्यासाठी येथे क्लिक करा.

त्याचवेळी त्यांच्या खात्यातून सात हजार ५९९ रुपये कपात झाले. हा संदेश मोबाईलवर आल्यावर कुलकर्णी यांनी भामट्याशी संपर्क साधत विचारणा केली. त्यावर त्याने तुमचे पैसे डेबीट झालेले नाहीत असे सांगितले. मात्र, फसवणुक झाल्याचे स्पष्ट झाल्याने त्यांनी बचत खाते बंद करण्यासाठी व त्यावरून होणारे व्यवहार थांबवण्यासाठी सिडकोतील बँक ऑफ महाराष्ट्रच्या शाखेशी मोबाईलवरुन संपर्क साधला. यादरम्यान त्यांच्या खात्यातून सहावेळा प्रत्येकी सात हजार ५९९ रुपये व एकवेळ पाच हजार ५० रुपये कपात झाल्याचे संदेश मोबाईलवर आला. याप्रकारानंतर ३१ जुलैला त्यांनी बँकेत जाऊन खात्याचे सर्व व्यवहार तपासले. तेव्हाही पन्नास हजार ६४४ रुपये खात्यात कमी होते. यामुळे त्यांनी पुंडलिकनगर पोलिस ठाण्यात तक्रार दिली. त्यानुसार गुन्ह्याची नोंद करण्यात आली. 

देशभरातील महत्त्वाच्या बातम्या वाचण्यासाठी येथे क्लिक करा.

(Edited By Pratap Awachar)