औरंगाबाद : राज्यात आतापर्यंत ६४ हजार ४९३ उद्योगांना परवानगी देण्यात आली असून, मराठवाड्यात ५ हजार ८२२ कारखाने सुरू झाल्याची माहिती उद्योगमंत्री सुभाष देसाई यांनी बुधवारी (ता. १३) येथे पत्रकार परिषदेत दिली. नवगुंतवणूकदारांना फक्त एकच महापरवाना लागेल. सध्या परप्रांतीय कामगार राज्यातून गेले आहेत. त्यामुळे नोकरीच्या अनेक संधी आहेत. आता मराठी माणसांची बेरोजगारी दूर करण्यासाठी त्या जागेवर भूमिपुत्रांना संधी द्यावी, अशा सूचनाही त्यांनी केल्या. 

हेही वाचा : कर्तव्य निभावताना हवे जबाबदारीचे भान  

श्री. देसाई यांच्या उपस्थितीत बुधवारी जिल्हाधिकारी कार्यालयात अधिकारी, लोकप्रतिनिधींसोबत बैठक झाली. त्यानंतर पत्रकारांशी बोलताना ते म्हणाले, की कोरोनाचे संकट मोठे आहे. त्यामुळेच पंतप्रधानांनी मोठे पॅकेज जाहीर केले आहे. कोणत्या विभागासाठी किती? हे अजून येणे बाकी आहे. इतर देशांतून आपल्याकडे काही उद्योग येऊ पाहत आहेत.

हेही वाचा : कोरोनाबद्दल साहित्यिक म्हणतात.. 

याबाबत आमच्या विभागाशी ते संपर्क साधत आहेत. हे प्रस्ताव अंतिम टप्प्यात आल्यानंतर सविस्तर सांगता येईल. नवगुंतवणूकदारांना फक्त एकच महापरवाना लागेल. तो तत्काळ दिला जाईल. एमआयडीसी औद्योगिक शेड उभे करणार असून मराठवाड्यात ५ हजार ८२२ कारखान्यांना परवानगी देण्यात आली आहे. विजेचा जेवढा वापर तेवढेच शुल्क आकारले जाईल. 

हेही वाचा : चिमुकल्यांनी जोडलेले हात करतात अस्वस्थ  

भूमिपुत्रांसाठी आजपर्यंत आपण लढत होतो. आता परिस्थितीनेच आपल्याला संधी आणली आहे. दरवर्षी १० लाख मुले-मुली पदवी घेऊन बाहेर पडत आहेत. देशात सर्वांत जास्त सवलती आपल्या राज्यात आहेत. उद्योजकांनीदेखील स्थानिक भूमिपुत्रांना रोजगाराची संधी द्यायला हवी. या माध्यमातून मराठी माणसांची बेरोजगारी दूर होईल. कोरोनाच्या पार्श्‍वभूमीवर महानगरपालिकेकडून ४ हजार खाटांची व्यवस्था करण्यात येत असल्याचेही त्यांनी नमूद केले. 

हेही वाचा : पद्धतशीर दृष्टीकोन ठेऊन लाॅकडाऊन उठवु शकतो - उद्योजक सुनील

मृत १६ मजुरांच्या मालकांशी बोलणार 
रेल्वे दुर्घटनेत चिरडले गेलेले १६ मजूर ज्या कंपनीत काम करीत होते, त्या मालकांची चौकशी होईलच; मात्र त्यांच्याकडे कर्मचाऱ्यांची बाकी असलेले पैसे याचीही माहिती घेतली जाणार आहे. शिवाय, त्यांच्याकडून अजून काय मदत करता येईल, याबद्दल देखील त्यांच्याशी बोलणार आहे. मृत्यू झालेल्या कुटुंबीयांना मदत मिळणारच, अशी ग्वाहीही श्री. देसाई यांनी दिली.