औरंगाबाद : सांस्कृतिक वारसा असलेले संत एकनाथ रंगमंदिर नूतनीकरणासाठी महापालिकेने बंद केले आहे. कोरोना विषाणूमुळे नाट्यगृह सध्या बंद असले तरी नव्या वर्षात म्हणजेच जानेवारी २०२१ मध्ये नवे रंगमंदिर नाट्यप्रेमींसाठी खुले होण्याची शक्यता आहे. नूतनीकरणाचे काम सध्या अंतिम टप्यात आले आहे.
संत एकनाथ रंगमंदिराच्या दुरवस्थेवरून अनेक नाट्य कलावंतांनी नाराजी व्यक्त केल्यानंतर महापालिकेला जाग आली. त्यानंतर देखभाल दुरुस्तीचे काम हाती घेण्यात आले. मात्र हे काम अत्यंत कासवगतीने सुरू होते. कामाची यादीही लांबत गेली. त्यामुळे नाट्यप्रेमींमधून पुन्हा एकदा नाराजीचा सुर उमटत होता. दरम्यान महापालिकेचे प्रशासक तथा आयुक्त आस्तिककुमार पांडेय यांनी स्मार्ट सिटीच्या निधीतून हे काम पूर्ण करण्याची प्रशासनाला सूचना केली. त्यानंतर कामाला गती मिळाली.
शहर अभियंता सखाराम पानझडे यांनी मंगळवारी (ता. २०) संत एकनाथ रंगमंदिराच्या कामाचा आढावा घेतला. यावेळी उपअभियंता ए. बी. देशमुख, विद्युत विभागाच्या मोहिनी गायकवाड, बांधकाम विभागाचे उपअभियंता तनपुरे यांच्यासह अधिकाऱ्यांची उपस्थिती होती. खुर्च्या बसविण्याचे आणि अग्निशमन यंत्रणेचे काम ७५ टक्के पूर्ण झाले असून, रोहित्र बसविण्यासाठी २५ लाख रुपये महावितरणकडे भरण्यात आले. स्मार्ट सिटी योजनेतून रंगमंचावरील व्यवस्थेच्या कामाची निविदा काढली जाणार आहे, अशी माहिती बैठकीत देण्यात आली. ही निविदा तातडीने काढण्याची सूचना पानझडे यांनी केली. काम जानेवारी २०२१ पर्यंत पूर्ण होण्याची शक्यता असून, पडदा त्यानंतर उघडू शकतो, असे श्री. पानझडे यांनी सांगितले.
(संपादन-प्रताप अवचार)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.