औरंगाबाद: सिडकोकडून बाबा पेट्रोल पंपाकडे जाणाऱ्या दोन भरधाव दुचाकींना कुत्रे आडवे आल्यानंतर त्यांची धडक झाली. हा अपघात इतका भीषण होता की दोन्ही दुचाकींवरील चालक तब्बल ५० फूटांपर्यंत फरफटत गेले. यात ते गंभीर जखमी झाल्याने उपचारादरम्यान बुधवारी (ता.९) त्यांचा मृत्यू झाला. आकाशवाणी चौकात मंगळवारी मध्यरात्रीनंतर हा अपघात झाला.

हे वाचलंत का- तिला म्हणाले, प्राध्यापकाची नोकरी लावतो, १७ लाखही उकळले, शेवटी तिनेच...

सय्यद आवेज सय्यद गाझी (२३, रा. जलाल कॉलनी) आणि सद्दाम सय्यद चाँद (२८, रा. संजयनगर, बायजीपुरा) अशी मृतांची नावे आहेत. आवेज हा गॅरेजवर काम करीत होता तर सद्दाम हा मटन शॉप चालवित होता. सद्दाम विवाहित असून त्याला दोन मुली आहेत. 

जवाहरनगर पोलिसांकडून मिळालेल्या माहितीनुसार, आवेज हा मित्रासोबत दुचाकीने सिडकोकडून बाबा पेट्रोल पंपाकडे जात होता. त्याचवेळी सद्दामदेखील आपल्या मित्रासोबत वेगळ्या दुचाकीने सिडकोकडून बाबा पेट्रोल पंपाकडे जात होता. दोन्ही दुचाकी आकाशवाणी चौकात येताच समोरून कुत्रे आडवे गेले. त्यामुळे त्यांची आपसात धडक झाली. त्यानंतर दोन्ही दुचाकी चालकांचा ताबा सुटला आणि ते रस्त्यावर पन्नास फूट फरफटत गेले.

क्लिक कराः एका गुन्ह्यात अडकले, दुसरा गुन्हा झाला उघड, महिला अधिकाऱ्याला मागितली 2 लाखांची खंडणी

यात चालक आवेज आणि सद्दाम हे गंभीर जखमी झाले. तर, पाठीमागे बसलेल्या तरुणांनाही गंभीर मार लागला. अपघाताची माहिती मिळताच आवेजचा भाऊ सय्यद फैज हा घटनास्थळी धावला. तसेच, जवाहरनगर आणि जिन्सी ठाण्याचे पोलिसही घटनास्थळी आले. त्यांनी जखमींना घाटीत दाखल केले. उपचार सुरू असताना आवेज आणि सद्दाम यांचा मृत्यू झाला. घटनास्थळी पोलिस निरीक्षक संतोष पाटील, सहायक फौजदार दत्तात्रय बोटके यांनी मदतकार्य केले. या प्रकरणी जवाहरनगर पोलिस ठाण्यात गुन्हा नोंद करण्यात आला.

हेही वाचा- कचऱ्याप्रमाणे व्हेंटीलेटर जिल्ह्यात टाकू दिले, खासदार जलील असे का म्हणाले?