औरंगाबाद : सिडको चौक ते हर्सुल टी पॉईंट रस्त्याला एकाच बाजूने सर्व्हिस रोड आहे. मात्र, त्यातील अडथळ्यामुळे सात किलोमीटरच्या रस्त्यात पाच ठिकाणी रॉंगसाईड निर्माण झाले आहेत. तर, दोन ठिकाणी दुचाकी आणि खासगी बसेस चक्‍क फुटपाथवरुनच धावत असल्याचे चित्र आहे. एसबीओए शाळेसमोर विद्यार्थ्यांना जीव मुठीत घेऊन रस्ता ओलांडावा लागत आहे. अतिक्रमणामुळे आंबेडकर चौक हे अपघाताचे केंद्र बनले आहे.

• सात किलोमीटरमध्ये पाच ठिकाणी रॉंगसाईड
• विद्यार्थ्यांना घालावा लागतोय जीव धोक्‍यात
• फुटपाथही ओलांडतात दुचाकी, खासगी बस

सिडको बसस्थानकासमोर दुभाजक बसवल्याने ये-जा करण्यासाठी सारस्वत बॅंकेसमोरील चौकाचा वापर होत आहे. मात्र, याठिकाणी दुभाजकातील अपुऱ्या अंतरामुळे एसटी वळण्यासाठी अडचणी येत आहेत. त्यामुळे बसस्थानकासमोरील वाहतुकीचा गोंधळ इथेही सुरु झाला आहे. काळा गणपती मंदीर ते वोक्‍हार्ट चौकादरम्यान असलेल्या भोले पान सेंटर येथेही सिग्नलची गरज आहे. गणपती मंदीरासमोर दुभाजक जोडल्याने इथून मोठी वर्दळ असते. मंदिरात पायी जाणाऱ्यांची संख्या अधिक आहे.

हेही वाचा - बीडचा सह्याद्री देवराई प्रकल्प महाराष्ट्रात पथदर्शी ठरेल - सयाजी शिंदे

एन सात येथून आंबेडकरनगर येथे दुभाजकाच्या मधून नागरिक जात असताना वाहतुकदारांचा खोळंबा होतो. शाळकरी मुले, पालक मोठ्या प्रमाणात रस्ता ओलांडतात. रेणुका माता मंदीरासमोरील सर्व्हिस रोडवर खांब लावल्याने तिथून मोठी वाहने जाऊ शकत नाहीत. एसबीओए शाळेसमोरील सिग्नल बंद तसेच सर्व्हिस रोडचा मार्ग बंद केल्याने शाळेची मुले नेण्यासाठी आलेले पालक रस्त्यावरच गाडी लावतात. मयुरपार्ककडे जाणाऱ्या मुलांना जीव मुठीत धरुन रस्ता पार करावा लागतो.

हेही वाचा - समृद्धी महामार्गाच्या कामाचा असाही साईड इफेक्ट, वाचा-

हर्सुल कारागृहाकडून जळगाव रस्त्यावर येणाऱ्यासाठी सिग्नलच नाही. कुठे पहावे हा वाहनधारकांना प्रश्‍न पडतो. हर्सुल टी पॉईंट ते गणपती मंदीरापर्यंत सर्व्हिस रोड नाही. आंबेडकरनगर येथे तर मुख्य रस्त्यावरही अतिक्रमण झाले आहे. त्यात पुन्हा रिक्षा उभ्या राहिलेल्या असतात. सिग्नल सुटल्यानंतर रिक्षा आणि वाहनधारकांच्या घाईने या गेल्या महिन्यातही जीवघेणे अपघात याठिकाणी घडले आहेत. यासाठी रॉंगसाईड रोखणे आणि अतिक्रमण हटवणे हे दोनच मार्ग आहे.

जाणून घ्या - मोबाइलमध्ये इंटरनेट वापरताय? गूगलच्या या सेटिंग्ज माहिती हव्याच! 

सर्व्हिस रोडवरील अडथळे..

1. वसंतराव नाईक चौक म्हणजेच सिडको चौकातून हर्सुल टी पॉईंटकडे जाणाऱ्या संपुर्ण रस्त्याला सर्व्हिस रोड आहे. मात्र, कारवाईपासून पळताना रिक्षावाले सर्व्हिस रोडचा वापर करायचे. म्हणून पोलिसांनी सुरवातीलाच लेमन ट्री हॉटेल जवळ रस्ता बंद केला आहे. मात्र, कॅनॉटकडून सिडको चौकाकडे येणाऱ्या वाहनधारकांची गैरसोय झाली आहे. सिडको बसस्थानकासमोरही रस्ता आणि सर्व्हिस रोड बंद असल्यास मुख्य रस्त्यावरुनच रॉंगसाईड वाहने चालवली जात आहेत.
2. एन. एक आणि सिडको बसस्थानकातून जळगाव रस्त्यावर येण्यासाठी थेट मार्ग बंद केला आहे. त्यामुळे सिडको किंवा सारस्वत बॅंकेसमोरील चौकातून वळसा घेऊन यावे लागते. सारस्वत बॅंकेसमोरुन कॅनॉटकडे जाणारे वाहनधारक हे रॉंगसाईड वाहन चालवत आहेत. याचवेळी कॅनॉटकडून जळगाव रस्त्यावर येताना कोपऱ्यावरच सौंदर्य बेट असल्याने याठिकाणी छोटे अपघात घडले आहेत.
3. वोक्‍हार्ट कंपनीशेजारील चौकातही असाच गोंधळ उडतो. बजरंग चौकाकडून नारेगावला जाणाऱ्या मार्गातही अडथळा आहे. बजरंग चौककडुन देवगिरी बॅंकेजवळ येतात. तिथून रॉंगसाईड घेत वोक्‍हार्ट चौकापर्यंत येत नारेगावकडे निघून जातात. नारेगावकडून येणारी वाहनेही एन. पाचमध्ये जाताना थोडा रॉंगसाईड घेतात. रॉंगसाईड घेताना दुचाकीस्वार तर फुटपाथचा वापर करतात.
4. एन सातमधून जळगाव रस्त्यावर येऊन पुर्वी थेट आंबेडकरनगरमध्ये जाता येत होते. मात्र, आंबेडकर नगरच्या समोरील दुभाजक बसवल्याने एन सातमधून आंबेडकरनगर, मिसारवाडीकडे जाणारी वाहने एन. सात येथूनच रस्ता ओलांडत आंबेडकरनगर पर्यंत रॉंगसाईड जात आहेत.
5. एसबीओए शाळेसमोरील मुख्य रस्त्यावरुन सर्व्हिस रोडवर येण्याचा मार्ग पोलिसांनी बंद केला आहे. त्यामुळे एन. 11 मध्ये ये-जा करणारे फुटपाथचा सर्रास वापर करत आहेत. फुटपाथ उंच आहे, शिवाय रस्ताकडेला मोठ्या प्रमाणात माती साचली आहे. यामुळे मुख्य रस्त्यावरुन फुटपाथवरुन सर्व्हिस रोडवर वाहन घेऊन जाताना घसरुन अपघात घडत आहेत.

असे आहेत चौक...

वसंतराव नाईक चौक
सिडको बसस्थानक
एसबीआय बॅंक
वोक्‍हार्ट चौक
एन. सात चौक
आंबेडकर चौक
अहिल्यादेवी होळकर चौक
सौभाग्य चौक
एसबीओए शाळा चौक
हर्सुल टी पॉईंट चौक