जाफराबाद (जि. जालना) : तालुक्यातील पिंपळखुटा शेत शिवारातील राजु खोसरे यांच्या शेतातील घरावर चार ते पाच दरोडेखोरांनी घरात घुसुन महिलांना कुऱ्हाड, लोखंडी राॅड आणि लाकडी दांड्याने जबर मारहाण करीत अंगावरील सोन्या चांदीच्या दागिन्यांसह रोख रक्कम लंपास केली. दरोडेखोरांच्या हल्ल्यात चार महिला गंभीर जखमी झाल्या आहेत. त्यांना उपचारासाठी तातडीने जालन्याच्या (Jalna) सामान्य रुग्णालयात दाखल करण्यात आले. ही घटना शनिवारी (ता.२५) रोजीच्या मध्यरात्री बारा वाजेनंतर घडली. जाफराबाद (Jafrabad) पिंपळखुटा शेत शिवारात शेतात राहणाऱ्या राजु रामदास खोसरे यांच्या घरातील एका खोलीची कडी लावून दुसऱ्या खोलीत चार ते पाच दरोडेखोरांनी प्रवेश केला. (Big Robbery In Jalna, Four Women Injured)

त्यानंतर सखुबाई रामदास खोसरे, रंजना संजय गाडेकर, लता रमेश गाडेकर, सुनीता कैसाल देवडे यांना कुऱ्हाड, लोखंडी राँड आणि लाकडी दांड्याने मारहाण करीत अंगावरील सोन्या चांदीचे दागिने काढुन घेतले. चांदीचे कडवळे, गळ्यातील सोन्याची पोथ, मनी मंगळसुत्र, नाकातील नथ, कानातील सोन्याचे दागिने, यासह घरातील लोखंडी पेटी उचकटुन त्यातील रोख १५ हजार आणि सोन्याची अंगठी लंपास केली. असा सुमारे साडेचार लाखांचा ऐवज दरोडे खोरांनी लंपास केला. या घटनेची माहिती पोलिसांना मिळताच पोलिस उपविभागीय अधिकारी इंदलसिंग बहुरे, पोलीस निरीक्षक रमेश जायभाये यांनी घटनास्थळी भेट देऊन परिस्थितीचे अवलोकन केले. तसेच घटनास्थळ पंचनामा केला.

तसेच दरोडेखोरांचा शोध घेण्यासाठी श्वानपथक पाचारण करण्यात आले होते. या प्रकरणी सुनिता कैलास देव्हडे यांनी दिलेल्या फिर्यादीवरुन अज्ञात आरोपीविरुध्द गुन्हा दाखल करण्यात आला असुन पुढील तपास पोलीस निरीक्षक रमेश जायभाये हे करीत आहे.