जालना - शहरातील पुलांचे कठडे मागील अनेक वर्षांपासून धोकादायक अवस्थेत आहेत. मात्र, याकडे नगरपालिका प्रशासन लक्ष देण्यास तयार नाही. परिणामी या धोकादायक पुलांना काटेरी फांद्या, पत्रांचा आधार देण्यात आल्याचे चित्र जालना शहरात पाहण्यास मिळत आहे. 

जालना शहरातील कुंडलिका-सीना नदीपात्रावर पाच पूल आहेत. तर नूतन वसाहत येथे उड्डाणपूल आहे. मागील काही महिन्यांपूर्वीच कुंडलिका नदीपात्रावरील इंग्रजकालीन लोखंडी पूल जमिनदोस्त करण्यात आला. शहरातील इतर पुलांच्या कठड्याची दुरावस्था झाली आहे.

हेही वाचा : दिवस येतील छान, घेऊ नका ताण

नूतन वसाहत येथील उड्डाणपुलावर काही वर्षांपूर्वी सळईने भरलेला ट्रक उलटला होता. त्यामुळे या पुलावरील कठडा कोसळला. मात्र, मागील दोन ते अडीच वर्षांपासून नगरपालिकेने या पुलाचा साधा कठडाही दुरूस्त केलेला नाही. उलट याठिकाणी काटेरी फांद्या लावून वाहनाचालकांना धोक्याचा इशारा दिला जात आहे.

हेही वाचा : जालन्यात मोबाइल व्हॅनव्दारे स्वॅब टेस्टिंग

दुसरीकडे कुंडलिका नदीपात्रावरील लहान पुलाचे कठडेही धोकादायक झाले आहेत. त्यामुळे नगरपालिका प्रशासनाकडून येथे चक्क पत्रे ठोकून वाहन चालकांना धोक्याचा इशारा दिला आहे आहे. मात्र, या पुलांचे कठडे दुरूस्तीकडे पालिका प्रशासन लक्ष देण्यास तयार नसल्याचे चित्र आहे. 

शहरातील उड्डाणपुलांच्या कठड्यांची दुरूस्तीच्या कामासंदर्भात प्रक्रीय सुरू आहे. येत्या काही दिवसांमध्ये या पुलांचे कठडे बसविण्यात येतील. तसेच इतर छोट्या पुलांची देखभाल दुरूस्तीही नगरपालिकेकडून केली जाईल. 
- नितीन नार्वेकर, मुख्याधिकारी, नगरपालिका, जालना. 

(संपादन : संजय कुलकर्णी)