सेलू (जि.परभणी) : शहरातील राजीव गांधी नगरात गळफास घेऊन पतीने आत्महत्या केली, तर पत्नीचा पलंगावर मृतदेह आढळून आला आहे. ही घटना सोमवारी (ता.२८) सकाळी सात वाजेच्या सुमारास उघडकीस आली. पोलिसांनी दिलेल्या प्राथमिक माहितीनुसार सेलू (Selu) शहरातून राजीव गांधी नगरातील अर्जुन गणेश आवटे (वय ३२ ) याने लोखंडी पत्राच्या आडूला नायलॉन दोरीच्या साहाय्याने गळफास घेऊन आत्महत्या केली. तर पत्नी प्रियंका (वय २८) हिचा मृतदेह पलंगावर आढळून आला. आवटे पती पत्नी एका खोलीत रविवारी राहत्या घरी झोपले होते. (Husband Committed Suicide, Wife Dead Body Found In Selu Of Parbhani)

सोमवारी सकाळी ७ वाजले तरी दोघेही झोपेतून उठले नसल्याने अर्जुन यांच्या बहिणीने रूमची कडी वाजवली तरी ते बाहेर आले नाहीत. अर्जुनच्या बहिणीने तिच्या वडीलांना माहिती दिली. त्यानंतर दरवाजा तोडून पाहिले असता दोघेही मृतावस्थेत आढळून आले. अर्जुनचा तीन वर्षांपूर्वीच प्रियंकाशी विवाह झाला होता. तो शहरात रिक्षा चालवून कुटुंबाचा गाडा चालवत होता. (Parbhani)

घटनास्थळी पोलीस निरीक्षक रावसाहेब गाडेवाड यांनी भेट देऊन पंचनामा केला असून तपास सुरु आहे. तपासानंतर आत्महत्येचे कारण स्पष्ट होईल, असे गाडेवाड यांनी सांगितले. प्रियंकाचा मुत्यू कसा झाला याचा तपास सुरु आहे.