औरंगाबाद : सिडकोतील बिबट्याची चर्चा आणि किस्से अद्याप संपत नाहीत, तोच आता सातारा गावाच्या माळावर नव्या बिबट्याचे आगमन झाल्याची चर्चा रंगली आहे. बुधवारी (ता. 11) सकाळी कडेपठारावर कालवड मृतावस्थेत सापडली असून, हे बिबट्याचेच काम असल्याचे वन खात्याच्या कर्मचाऱ्यांनी आणि तज्ज्ञांनी म्हटले आहे.
सातारा तांड्यापुढील डोंगराळ भाग वन खात्याच्या अखत्यारीत येतो. मात्र, या भागात तरस वगैरे कधी कधी येत असले, तरी पूर्वी कधी बिबट्याचे वास्तव्य नव्हते. मंगळवारी (ता. १०) सायंकाळी तांड्यावरील गोपाळांच्या गायी परतल्या, त्यात एक कालवड मागे राहिली. रात्रीच्या अंधारात तिचा शोध घेणे शक्य नसल्याने गुराख्यांनी सकाळी माळावर शोध सुरू केला. यावेळी कडेपठाराच्या मार्गावर ती कालवड मृतावस्थेत आढळून आली. गावकऱ्यांनी वन खात्याच्या कर्मचाऱ्यांना याबद्दल माहिती दिली असता, त्यांनीही घटनास्थळी भेट देत पाहणी केल्याचे गावकऱ्यांनी सांगितले.
खोल जखमा, बिबट्याचाच अंदाज
वन खात्याच्या अनुभवी कर्मचाऱ्यांनी पाहणी केली असता, कालवडीच्या पाठीवरील आणि नरडीवरील मोठ्या जखमा, दातांचे व्रण बिबट्याचेच असल्याचा अंदाज व्यक्त केला आहे. या भागात तरसांनी सामुहिक हल्ला करण्याची शक्यता काहींनी वर्तवली असली, तरी जखमांचे व्रण पाहता हा हल्ला मोठ्या जनावरानेच केल्याचा वनपालांचा कयास असल्याचे गुराख्यांनी सांगितले. मात्र, याबद्दल वन परिक्षेत्र अधिकारी शशिकांत तांबे यांच्याशी संपर्क करण्याचा प्रयत्न केला असता, त्यांचा फोन बंद होता.
आज करणार कसून पाहणी
या भागात पूर्वी बिबट्याचे वास्तव्य आढळले नसले, तरी तो इथे आल्याची शक्यता नाकारता येत नाही. तो प्रत्यक्ष कुणाला दिसला नसल्याने, त्याच्या पावलांचे ठसे, मार्ग याचा शोध घेऊन नक्की निष्कर्ष काढता येईल, असे वनपाल एस. बी. चव्हाण आणि वनरक्षक हरिसिंग घुसिंगे यांनी सांगितले. या भागात गुरुवारी (ता. १२) सकाळी वन विभागाचे पथक बारकाईने पाहणी करणार असल्याचे त्यांनी सांगितले. मात्र, बिबट्या असलाच, तरी तो वनक्षेत्राच्या बाहेर आलेला नाही. तसेच त्याच रात्रीतून तो निघून गेल्याचीही शक्यता असू शकते. त्यामुळे परिसरातील नागरिकांनी यामुळे घाबरून जाण्याचे कारण नाही, असेही त्यांनी म्हटले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.