उस्मानाबाद : सलग दुसऱ्या दिवशी गुरुवारी रात्री पावसाने जिल्ह्यतील तीन तालुक्यांमध्ये जोरदार हजेरी लावली. कळंब, वाशी आणि भूम तालुक्यात चांगला पाऊस झाल्याने नद्या, नाले ओसंडून वाहत आहेत.
बुधवारी रात्री जिल्ह्याच्या सर्वच भागात समाधानकारक पाऊस झाल्यानंतर गुरुवारी पुन्हा पावसाने जिल्ह्याच्या काही भागात दमदार हजेरी लावली. विशेष म्हणजे या भागांमध्ये गेल्या दोन-तीन वर्षांमध्ये पाऊस झाला नव्हता. अशा महसूल मंडळात पावसाने चांगलीच हजेरी लावली आहे. कळंब तालुक्यामध्ये सलग दुसऱ्या दिवशी चांगला पाऊस झाला आहे.
तालुक्यातील कळंब महसूल मंडळात ५३ मिलिमीटर पावसाची नोंद झाली. तर शिराढोन १९, ईटकुर ४३, येरमळा ४१, मोहा ४७ आणि गोविंदपुर ४८ मिलिमीटर पावसाची नोंद झाली आहे. त्यामुळे तालुक्यातील बहुतांश नद्या, नाले, ओढे ओसंडून वाहू लागले आहेत.
शेतातील ताली, बांध पूर्णपणे पाण्याने भरले आहेत. दोन दिवस झालेल्या पावसाने पेरणीयोग्य पाऊस झाल्याचे शेतकरी सांगत आहेत. पावसाने उघडीप देताच पेरणीला सुरुवात करणार असल्याचं शेतकरी वर्गात बोलले जात आहे. त्यामुळे बियाणी, खते खरेदी करण्यासाठी मोठ्या प्रमाणात गर्दी होऊ लागली आहे. वाशी तालुक्यात ही सरासरी ३४ मिलीमटर पाऊस झाला आहे. यामध्ये वाशी महसूल मंडळात ३२ मीलीमीटर तर तेरखेडा येथे हे ६१ मिलिमीटर पावसाची नोंद झाली आहे. तेरखेडा येथून तेरणा नदीचा उगम होतो. त्या ठिकाणी पावसाने दमदार हजेरी लावल्याने तेरणा नदीही भरून वाहू लागली आहे.
नदीवरील अनेक बंधारे तुडुंब भरले आहेत. बुधवारी रात्री भूम तालुक्यात जोरदार पाऊस झाला होता. मात्र आंबी महसूल मंडळात पावसाने अगदीच थोडी हजेरी लावली होती. मात्र या भागात गुरुवारी पावसाने जोरदार बॅटिंग केली. ४५ मिलिमीटर पावसाची नोंद आंबी महसूल मंडळात झाली आहे. त्यामुळे आता तालुक्याच्या सर्व महसूल मंडळात समाधानकारक पाऊस झाल्याचे चित्र आहे. उस्मानाबाद तालुक्यातील बहुतांश महसूल मंडळात काल तुरळक पाऊस झाला. मात्र उस्मानाबाद ग्रामीण महसूल मंडळात पावसाने चांगलीच हजेरी लावली. सुमारे ४३ मिलिमीटर पावसाची नोंद या महसूल मंडळ झाली आहे.
लोहारा निरंक इतर तालुक्यात शिडकावा
लोहारा तालुक्यात मात्र गुरुवारी पाऊस झाला नाही. एकाही मंडळात पावसाने हजेरी लावली नाही. उमरगा तुळजापूर या दोन्ही तालुक्यांमध्ये तुरळक प्रमाणात पाऊस झाला तर अनेक महसूल मंडळात पाऊस झालाच नाही.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.