महाराष्ट्रात काही काळापासून क्लेशदायक वातावरण सुरू आहे. राज्यात सुरु असणारी सर्कस राजकारण म्हणून न पटणारी आहे. राज्यात सगळं सुरळीत सुरु असतानाही या बंडखोरांनी पाठीत खंजीर का खुपसला, असा सवाल करत शिवसेनेचे नेते आदित्य ठाकरे यांनी शिंदे गटावर निशाणा साधला आहे. आज ते भिवंडीतील शिवसंवाद यात्रेदरम्यान बोलत होते. यावेळी संवाद साधताना त्यांनी राजकारण जमलं नाही हेच आपलं चुकलं असं भावूक विधान केलं आहे.

या संवाद यात्रेदरम्यान बोलत असताना आदित्य ठाकरे यांनी शिंदे गटावर हल्लाबोल केला. ते म्हणाले, जे गेले त्यांच्या रक्तात शिवसेना कधीच नव्हती. आपल्या खासदार, आमदारांवर लक्ष ठेवण्याऐवजी विश्वास ठेवला हेच आपले चुकले. या बंडखोरांनी कोणताही उठाव केलेला नाही, त्यांनी गद्दारीच केली आहे. त्यामुळे शिंदे-फडणवीस सरकार लवकरच कोसळणार आहे, असं सूचक वक्तव्यही आदित्य ठाकरे यांनी केलं आहे.

पुढे शिंदे सरकारवर आरोप करत ठाकरे म्हणले, शिवसैनिकांना धमक्या दिल्या जात आहेत. उद्धव ठाकरे आजारी असताना ही बंडाची तयारी सुरू झाली होती. त्यामुळे हा कोणताही उठाव नाही ही गद्दारीच आहे असा घणाघातही आदित्य ठाकरे यांनी केला आहे. पुढे ते बंडखोरांना म्हणाले, तुम्हाला कुठे रहायचं असेल तिथे रहा. मात्र आमदाराकीचा राजीनामा देऊन निवडणुकीला समोरे या, त्यावेळी जे काही जनता ठरवेल ते शिवसेनेला मान्य असेल. ज्याला कुणाला परत यायचं असेल त्याच्यासाठी मातोश्रीचे दरवाजे खुले आहे. तुम्ही कधीही येऊ शकता.