मुंबई ः शिवसेनेचे फायरब्रँड नेते व दै. सामना चे कार्यकारी संपादक खासदार संजय राऊत यांच्या कुटुंबात आता जावयाचे आगमन झाले आहे. त्यांची कन्या पूर्वेशी हिचा साखरपुडा मल्हार नार्वेकर यांच्याशी आज झाला.
भारताच्या राजकारणात गल्लीपासून ते दिल्लीपर्यंत अनेक जावयांनी आपल्या सासऱ्यांची व सासूची देखील कोंडी केल्याची उदाहरणे आहेत. त्यामुळे जामातो दशमो ग्रहः हे वाक्य भारतीय राजकारण्यांना अचूक लागू होते, असे गमतीत म्हटले जाते. एरवी आपल्या `संजया`च्या दिव्यदृष्टीने राजकारणात अचूक डावपेच रचणारे, मर्मभेदक वक्तव्ये आणि मार्मिक लेखाबद्दल प्रसिद्ध असणारे संजय राऊत यांना सध्या ईडी च्या पीडेने ग्रासले आहे. अशा स्थितीत या दहाव्या ग्रहाच्या आगमनामुळे त्यांच्यामागची ही पीडा जाईल का, अशी गमतीदार चर्चाही आता सुरु झाली आहे.
आज एका आलिशान पंचतारांकित हॉटेलात दोन्हीकडच्या मर्यादित कुटुंबियांच्या उपस्थितीत हा साखरपुडा झाला. यावेळी राष्ट्रवादी काँग्रेसच्या नेत्या व खासदार सुप्रिया सुळे हजर होत्या. त्यानंतर संध्याकाळी रिसेप्शनला सर्वपक्षीय वरिष्ठ नेत्यांनी तसेच राज्य मंत्रीमंडळातील सदस्यांनी हजेरी लावली होती. यावेळी विरोधी पक्षनेते देवेंद्र फडणवीस आणि संजय राऊत यांनी एकमेकांना दिलखुलास मिठी मारली. ज्येष्ठ नेते शरद पवार यांच्यासाह्याने शिवसेना, काँग्रेस व राष्ट्रवादी काँग्रेस ही न भूतो न भविष्यती अशी युती घडवून आणणारे राऊत यानिमित्ताने काही नव्या ग्रहांची युती घडवून आणतील का अशीही खुमासदार चर्चा यानिमित्ताने झाली.
मल्हार हे आयटी अभियंते असून त्यांचा स्वतःचा व्यवसाय असल्याचे सांगितले जाते. तर पूर्वेशी या चित्रपट निर्मिती क्षेत्रात काम करीत आहेत. मल्हार यांचे वडील राजेश नार्वेकर हे वरिष्ठ सनदी अधिकारी असून ते सध्या ठाण्याचे जिल्हाधिकारी आहेत. ते दोन वर्षांपूर्वी मुख्यमंत्र्यांचे सहसचिव होते. तर त्यापूर्वी त्यांनी रत्नागिरी जिल्ह्यात तसेच रायगड जिल्हा परिषदेचे मुख्य कार्यकारी अधिकारी म्हणून जबाबदारी सांभाळली होती. रायगड जिल्हा हागणदरीमुक्त करण्यात त्यांनी महत्वाची भूमिका पार पाडली होती. तर रत्नागिरी जिल्ह्यात काम करताना त्यांनी स्वच्छ भारत व पंतप्रधान आवास योजना राबवल्या होत्या. ठाण्याचे जिल्हाधिकारी म्हणून काम करताना कोरोनाचा फैलाव होऊ नये म्हणून त्यांनी काही कठोर उपाययोजना राबविल्या होत्या.
-----------------------------------------
( संपादन - तुषार सोनवणे )
mumbai political news Sanjay Rauts daughter Purveshi had a engage with Malhar Narvekar
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.