मुंबई : महाराष्ट्र नवनिर्माण सेनेकडून रविवारी (ता.9) बांगलादेशी आणि पाकिस्तानी घुसखोरांविरोधात भव्य मोर्चा काढण्यात आला. नवी राजकीय भूमिका घेतल्यानंतर मनसेचा हा पहिलाच मोर्चा होता. विशेष म्हणजे हा मोर्चा काढला ती तारीख 9 आहे. राज ठाकरे यांचा शुभ क्रमांक 9 मानला जातो. यामुळे मोर्च्यामध्येही मनसैनिक 9 अंक असलेला टी-शर्ट घालून सहभागी झाले होते. एकूणच राज ठाकरे यांनी आपल्या "लकी नंबर'च्या दिवशी मोर्चा आयोजित केला असल्याची चर्चा सुरू आहे.

मोठी बातमी पाचशे रुपयांसाठी केला ब्लेडने हल्ला

राज ठाकरे यांनी आतापर्यंत त्यांची सर्व महत्त्वाची कामे त्यांच्या 9 या "लकी अंका'नुसार केली. राज ठाकरे रविवारी मोर्चासाठी त्यांच्या 9 क्रमांक असलेल्या गाडीतूनच रवाना झाले. इतकेच नाही; तर मोर्चासाठीची तयारीही त्यांनी सकाळी 9 वाजता सुरू केल्याचे समजते. पूर्वी शिवसेनेत असताना असो किंवा मनसेची स्थापना केल्यानंतर असो; राज ठाकरेंचे 9 अंकावरील प्रेम वारंवार दिसून आले आहे. आपल्या मुलाच्या लग्नाच्या निमित्तानेदेखील राज ठाकरेंनी आपला लकी नंबर जपण्याचा पुरेपूर प्रयत्न केला होता.

हे सुद्धा वाचा संरक्षक कठड्यालाच कारची धडक

नुकत्याच झालेल्या विधानसभा निवडणुकीतही राज यांनी आपल्या प्रचाराची सुरुवात 9 तारखेपासूनच केली होती. पहिल्या सभेच्या मुहूर्तासाठी मनसेने आपला लकी नंबर 9 निवडला होता. मनसेचे महत्त्वाचे निर्णय किंवा एखादा शुभारंभ हादेखील याच अंकाभोवती फिरताना दिसतो. पारशी जिमखाना ते आझाद मैदानापर्यंत काढलेल्या मोर्चादरम्यान रस्त्यावर लावण्यात आलेल्या राज ठाकरेंच्या फलकावरही 9 हा अंक ठळकपणे दिसून आला. या वेळी 9 हा अंक नवनिर्माण करील, असा विश्वास मनसैनिकांनी व्यक्त केला.

ही बातमी वाचली का... हवालदाराचा अपघाती मृत्यू

राज ठाकरेंकडून जय्यत तयारी 
महामोर्चासाठी राज ठाकरे जय्यत तयारीने घराबाहेर पडले. त्या वेळी त्यांनी पहिल्यांदाच आपल्या दंडावर राजमुद्रा असलेला बॅंड धारण केला. कृष्णकुंजवर आलेल्या कार्यकर्त्यांच्या दंडावरदेखील त्यांनी स्वत: राजमुद्रा असलेला बॅंड बांधला. यानंतर पत्नी शर्मिला, मुलगा अमित आणि सून मिताली ठाकरे यांच्यासह राज ठाकरे आपल्या 9 क्रमांकाच्या वाहनाने सिद्धिविनायक मंदिरात जाऊन श्रींचे दर्शन घेऊन सभास्थानाच्या दिशेने रवाना झाले. 

ताज्या बातम्यांसाठी डाऊनलोड करा ई-सकाळचे ऍप

मनसैनिकांकडून 9 क्रमांकाचा बोलबाला 
मनसेच्या वतीने महामोर्चासाठी विशेष टी-शर्ट आणि टोप्या बनवण्यात आल्या होत्या. मनसेने आपल्या झेंड्याचा रंग भगवा केल्यामुळे टोप्यादेखील भगव्या करण्यात आल्या; तर त्यावर शिवमुद्रेचे चिन्ह कोरण्यात आले होते. त्याचप्रमाणे काळ्या रंगाच्या टी-शर्टवर नऊ अंक व भगव्या रंगाची शिवमुद्रा अशा प्रकारचे टी-शर्टदेखील मनसैनिकांनी मोठ्या प्रमाणात घातले होते. राज्यातील जिल्हा आणि शहरातील शहरप्रमुख; तसेच जिल्हाप्रमुखांना हे टी-शर्ट आणि टोप्या मोठ्या प्रमाणात तयार करण्यास सांगण्यात आले होते.

Raj Thackeray Navnirman with the help of "Lucky 9"!