कासा : मुंबई-अहमदाबाद महामार्गावर (Mumbai-Ahmadabad Highway) कासा आणि मेंढवण येथे रविवारी (ता. ६) झालेल्या दोन अपघातात (Accident) एक जण ठार, तर दोन जखमी (one person died) झाले. गेल्या काही दिवसांत या महामार्गावर अपघातांच्या संख्येत वाढ होत असून, महामार्ग प्राधिकरणाने वेग नियंत्रणासाठी सूचना फलक व गतिरोधक बसवावेत, अशी मागणी जोर धरत आहे.

रविवारी सायंकाळी ७.३० च्या सुमारास मेंढवण येथे गुजरात वाहिनीवर चालत जाणाऱ्या दोन पादचाऱ्यांना भरधाव वाहनाने धडक दिली. यात दोघेही गंभीर जखमी झाले. त्यांना ग्रामस्थांनी जखमी अवस्थेत कासा येथील उपजिल्हा रुग्णालयात दाखल केले. डॉक्टरांनी प्रथमोपचार करून डोक्याला, पायाला व हाताला गंभीर जखम झाल्याने त्यांना पुढील उपचारासाठी शेलवास येथील विनोबा भावे रुग्णालयात उपचारासाठी पाठवले.

दुसरा अपघात सायंकाळी ७.४५ वाजता कासा-सायवन मार्गावरील वाघाडी गावाजवळील वळणावर भरधाव कार चालकाचे वाहनावरील नियंत्रण सुटून कार रस्त्याजवळील झाडावर धडकली. यात कारचालक माणिक बद्रे (३२, रा. यवतमाळ) हे गंभीर जखमी झाले. बद्रे हे सायवन येथील सरकारी आश्रम शाळेत अधीक्षक म्हणून कार्यरत होते. त्यांना स्थानिकांनी उपजिल्हा रुग्णालयात दाखल केले; परंतु मोठ्या प्रमाणात रक्तस्राव झाल्याने डॉक्टरांनी त्यांना मृत घोषित केले. बद्रे हे काही वर्षांपूर्वी सायवन येथे कार्यरत झाले होते.