Andheri Crime: ड्रग्जच्या आहारी गेलेल्या मुलाची आईने चाकूने भोसकून हत्या केल्याची घटना जोगेश्‍वरी परिसरात उघडकीस आली आहे. शिवकुमार शितलाप्रसाद दुबे असे मृत मुलाचे नाव असून त्याच्या हत्येप्रकरणी बिंदू शितलाप्रसाद दुबे हिला ओशिवरा पोलिसांनी अटक केली. (Jogeshvari Crime)

आरोपी आईला रविवारी (ता.१४) वांद्रे येथील स्थानिक न्यायालयात हजर केले जाणार आहे. बिंदू ही मूळची उत्तरप्रदेशची रहिवासी असून ती जोगेश्‍वरीतील शुक्ला कंपाउंडमध्ये तिच्या दोन मुलांसह राहते. तिचा पती शितलाप्रसाद हे उत्तरप्रदेशात वास्तवास आहे.

दरम्यान शिवकुमार हा काहीच कामधंदा करत नसून त्याला ड्रग्ज सेवन करण्याचे व्यसन लागले होते. त्यातून बिंदू हिचे त्याच्यासोबत खटके उडत होते. शनिवारी सायंकाळी शिवकुमार हा नेहमीप्रमाणे ड्रग्जच्या नशेत घरी आला होता. यावेळी त्यांच्यात कडाक्याचे भांडण झाले होते.

या वादातून रागाच्या भरात त्याने बिंदूला हँगरने मारहाण केली त्यातच बिंदूनेही चाकूने त्याच्यावर छातीवर वार केले होते. यामध्ये शिवकुमार हा गंभीररीत्या जखमी झाला.

घटनेच्या माहितीनंतर ओशिवरा पोलिसांनी घटनास्थळी धाव जखमी शिवकुमारला जवळच्या शासकीय रुग्णालयात दाखल केले मात्र तेथील डॉक्टरांनी त्याला मृत घोषित केले. याप्रकरणी पोलिसांनी हत्येचा गुन्हा नोंदवला आहे.( Drug addicted child stabbed to death by mother)