Bhiwandi News: भिवंडी लोकसभा मतदारसंघातील कार्यकर्त्यांच्या आग्रहास्तव एमआयएम पक्ष लोकसभा निवडणूक लढणार असल्याची माहिती एमआयएम पक्षाचे प्रवक्ते तथा माजी आमदार वारीस पठाण यांनी दिली.

शहरातील खंडूपाडा भागात रमजान ईद मिलन कार्यक्रमाचे आयोजन एमआयएमचे शहर सचिव शादाब उस्मानी यांनी केले होते. यावेळी त्यांनी पत्रकारांशी संवाद साधला. यावेळी झालेल्या पत्रकार परिषदेत विचारलेल्या प्रश्नांना उत्तरे देताना त्यांनी सांगितले की, निवडणुकीत उमेदवार उभा करण्यासाठी कार्यकर्त्यांचा आग्रह आहे. त्यामुळे आमचा पक्ष याठिकाणी उमेदवार देणार आहे. या कार्यक्रमासाठी शहरातील मान्यवर व पक्षातील पदाधिकारी उपस्थित होते.

एमआयएमचे शहर सचिव शादाब उस्मानी यांनी यावेळी सांगितले की, या लोकसभा निवडणुकीतून भविष्यातील निवडणुकीची मोर्चेबांधणी करण्यासाठी आमचा पक्ष तयारी करणार आहे.

दरम्‍यान, भिवंडी हे मुस्लिमबहुल शहर असून येथे काँग्रेस, समाजवादी पक्ष, बहुजन समाज पक्ष, एमआयएम आदी पक्षांचे मतदार मोठ्या संख्येने असल्याने विविध निवडणुकांमध्ये या मतदारांच्या मतदानाने उमेदवाराचे भवितव्य अवलंबून असते.