Diwali Gift from Konkan Railway : कोकण रेल्वेमार्गावर सिंधुदुर्गात लांब पल्ल्याच्या चार गाड्यांना थांबा देण्याचा निर्णय घेतला आहे. यामध्ये सिंधुदुर्ग रेल्वे स्थानकावर हजरत निजामुद्दीन एक्स्प्रेस व अजमेर मरू सागर एक्स्प्रेस आणि कणकवली रेल्वे स्थानकावर हिसार-कोयंबतूर एक्स्प्रेस व गांधीधाम नागर कोईल एक्स्प्रेस या चार गाड्यांना थांबा दिला जाणार आहे. यामुळे कोकण रेल्वेने प्रवास करणाऱ्या सिंधुदुर्ग जिल्ह्यातील प्रवाशांना ही दिवाळी भेटच मिळाली आहे.

रेल्वे बोर्डाच्या नुकत्याच झालेल्या बैठकीमध्ये रेल्वे मंत्रालयाने सिंधुदुर्ग आणि कणकवली स्थानकांवर लांब पल्ल्याच्या चार गाड्यांना थांबा देण्याचा निर्णय घेतला आहे. याबाबत रेल्वे बोर्डाकडून १७ ऑक्टोबरला आदेश जारी केला असून, लवकरच याची अंमलबजावणी होणार आहे.

सिंधुदुर्गचे पालकमंत्री तथा महाराष्ट्राचे मत्स्य व्यवसाय व बंदर विकास मंत्री नीतेश राणे यांनी रेल्वेमंत्री अश्विनकुमार वैष्णव यांच्याकडे मागणी केली होती. त्यांचे हे प्रयत्न यशस्वी ठरले असून, रेल्वेने सिंधुदुर्ग व कणकवली रेल्वे स्थानकांवर मागणीप्रमाणे लांब पल्ल्याच्या प्रत्येकी दोन गाड्या थांबवण्याचा निर्णय घेतला आहे.

प्रवाशांपर्यंत माहिती पोहोचवण्याचे आदेश

सिंधुदुर्ग स्थानकावर एर्नाकुलम-हजरत निजामुद्दीन एक्स्प्रेस आणि एर्नाकुलम-अजमेर मरुसागर एक्स्प्रेस या दोन गाड्यांना थांबा दिला आहे. कणकवली स्थानकावर हिसार-कोयंबतूर एक्स्प्रेस आणि गांधीधाम-नागरकोइल एक्स्प्रेस या दोन गाड्यांना थांबा दिला आहे. रेल्वे बोर्डाने स्थानिक स्तरावर तिकीट विक्रीवर लक्ष ठेवण्याचे व या गाड्यांच्या वेळेबाबत प्रवाशांना योग्य ती माहिती मिळावी, यासाठी या निर्णयाची व्यापक प्रसिद्धी देण्याचे आणि अंमलबजावणी सुनिश्चित करण्याचे आदेश संबंधित अधिकाऱ्यांना दिले.