इचलकरंजी : तारदाळ (ता. हातकणंगले) येथे वडिलांनीच सुपारी देऊन मुलाचा खून केल्याचा प्रकार घडलाय. राहुल दिलीप कोळी (वय ३१ रा. कोळी गल्ली, तारदाळ) असे खून झालेल्याचे नाव आहे.

त्याच्या वडिलांनीच ७५ हजार रुपयांना सुपारी देऊन दोन साथीदारांसह खून केल्याची कबुली दिल्याची माहिती पोलिस उपअधीक्षक समीरसिंग साळवे यांनी दिली. शहापूर पोलिसांनी याप्रकरणी रात्री उशिरा खुनाचा गुन्हाचा दाखल करत दिलीप कोळी, विकास पोवार (दोघे रा. तारदाळ), सतीश कांबळे (रा. तमदलगे) यांना ताब्यात घेतले.

अवघ्या काही तासांतच पोलिसांनी खुनाचा धक्कादायक प्रकार उघडकीस आणला. याबाबत पोलिसांनी दिलेली माहिती अशी ः तारदाळ येथील दिलीप कोळीचा राहुल मुलगा आहे. तो विवाहित आहे. तो सतत मद्यपान करून कुटुंबाला त्रास देत होता. सततच्या त्रासाने त्याची पत्नी मुलांसह माहेरीच असते. राहुलच्या वागण्याला आई-वडील कंटाळले होते.

यावरून राहुलचे कुटुंबाबरोबर नेहमी भांडणे व्हायची. काल पहाटेच्या सुमारास राहुलचा मृतदेह तारदाळ माळावर आढळल्याची माहिती शहापूर पोलिसांना समजली. आयकॉनिक कंपनीच्या मागील बाजूस रेल्वे पटरीच्या लगत राहुलचा मृतदेह सापडला. रेल्वेला धडक बसून मृत्यू झाल्याचा संशय पोलिसांनी व्यक्त केला; मात्र मृतदेहाच्या डोक्यावरचे वर्मी घाव आणि काही अंतरापर्यंत रक्ताचे थेंब अन् थारोळे दिसून आले.

साळवे यांनी घटनास्थळी पाहणी केली आणि घातपातच्या दृष्टीने तपासाच्या सूचना केल्या. त्यानुसार पोलिसांनी राहुलच्या नातेवाईकांकडे चौकशी करत वडील दिलीप, भाऊ सचिन यांच्याकडे विचारणा केली. चौकशीत पोलिसांना वडिलांचा दाट संशय आला. त्यांना ताब्यात घेऊन चौकशी सुरू केली. रात्री उशिरा कौटुंबिक वादातून वडील दिलीप कोळी यांनी दोन साथीदारांसह राहुलचा खून केल्याची कबुली दिली.

एकूण रोख ७५ हजार रुपये विकास पोवार व सतीश कांबळे यांना दिले. सुरुवातीला २५ हजार रुपये दिले आणि उर्वरित रक्कम खून झाल्यानंतर देण्याचा व्यवहार झाल्याची स्पष्टता कोळी याने तपासात दिली. सहाय्यक पोलिस निरीक्षक अभिजित पाटील यांच्या मार्गदर्शनाखाली दीपक माळी, योगेश अवघडे, प्रमोद भांगरे, आरीफ वडगावे, शशिकांत डोणे, असिफ कलेगार यांनी कारवाईत सहभाग घेतला.