गडहिंग्लज ( कोल्हापूर ) - येथील बसस्थानकासमोरील दसरा चौक परिसरात पोलिस पथकाने 55 हजार रूपये किमतीचे विनापरवाना गावठी बनावटीचे पिस्तुल व तीन पितळी जिवंत राऊंड जप्त करण्यात आले. याप्रकरणी विजय जोतिबा आवढण ( 24, रा. वैतागवाडी, ता. चंदगड) याला पोलिसांनी अटक केली आहे. आज दुपारी पावणेएकच्या सुमारास ही घटना घडली.
येथील पोलिस उपअधीक्षक कार्यालयातील कॉन्स्टेबल राजासाब सनदी यांना एकजण विनापरवाना गावठी बनावटीचे पिस्तूल विक्रीसाठी गडहिंग्लजच्या बसस्थानकाजवळ येत असल्याची बातमी मिळाली. त्यानुसार सनदी यांनी उपअधीक्षक अंगद जाधवर व पोलिस निरीक्षक प्रकाश गायकवाड यांना याची कल्पना दिली.
त्यानंतर पोलिस हवालदार श्री. ठिकारे, श्री. मुळीक, राजासाब सनदी, श्री. कांबळे, गजानन गुरव यांचे पथक खासगी वाहनाने बसस्थानकाजवळ जावून ठिकठिकाणी थांबले. दुपारी पावणेएकच्या सुमारास साधना बुक स्टॉलजवळ एकजण संशयीतरित्या फिरताना आढळला. त्याला पथकाने घेरले. त्याची अधिक चौकशी करता त्याच्या कमरेला स्टिल बॉडी व मुठीला तपकीरी रंगाची प्लास्टिक कव्हर असलेली गावठी बनावटीची पिस्तूल आणि डाव्या खिशात पितळी तीन जिवंत राऊंड सापडले. हा मुद्देमाल पोलिस पथकाने जप्त केला. अधिक चौकशीत त्याने आपले नाव विजय आवढण असे सांगितले.
ही पिस्तूल 55 हजार रूपये किमतीची असून सहाशे रूपये किमतीचे तीन जिवंत राऊंड आहेत. राऊंडवर KF 7.65 असे लिहिलेले आहे. पोलिस कॉन्स्टेबल गजानन गुरव यांनी दिलेल्या फिर्यादीनुसार या प्रकरणी आवढण याच्या विरूद्ध भारतीय हत्यार कायद्यानुसार गुन्हा दाखल केला आहे. शहरातील भरवस्तीत सापळा रचून पिस्तूल जप्तीची कारवाई केल्याची बातमी समजताच खळबळ उडाली आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.