माजलगाव : मागील वर्षी उच्चांकी १२ ते १३ हजार रूपये प्रतिक्विंटल पर्यंत गेलेल्या कापसाचे दर शेतकऱ्यांकडे कापूस येताच पडले आहेत. तर, दुसरीकडे वेचणीस मात्र दहा रूपये प्रतिकिलो पैसे शेतकऱ्यांना मोजावे लागत आहेत.

मागील वर्षी कापसाला उच्चांकी दर मिळाला होता. यामुळे यावर्षीही खरीप हंगामात तालुक्यामध्ये २२ हजार ६१८ हेक्टरवर कपाशीची लागवड झाली होती. यावर्षीही मोठा भाव मिळण्याची अपेक्षा शेतकऱ्यांना असताना आता वेचणी करून बहुतांश शेतकऱ्यांनी कापूस घरात आणला आहे.

तर, अनेक शेतकऱ्यांना असलेली आर्थिक नड दूर करण्यासाठी शेतकरी कापूस विक्री करत आहेत. परंतु, बाजारात साडेसात ते सात हजार सातशे रुपयांपर्यंतचा दर कापसाला मिळत आहे. याउलट शेतकऱ्यांना कापूस वेचणी करण्यासाठी मजुर मिळत नसून, दहा रूपये प्रतिकिलोचा भाव कापूस वेचणाऱ्या मजुरास द्यावा लागत आहे.

मनकॉट, कुणाल आणि पी. एस. कॉटन या तीन जिनिंगवरून कापूस खरेदीची सुरवात करण्यात आली आहे. प्रारंभी ७,७०० रूपये दर देण्यात आला होता. परतीच्या पावसामुळे कापसाची आद्रता तपासून भाव देण्यात येत आहे. सध्या २० ते २२ टक्के आद्रता आहे. ८ ते १० टक्के आद्रता असलेल्या कपाशीला साडे सात हजार रुपयांपर्यंतचा दर देण्यात येत आहे. शेतकऱ्यांनी जिनिंगवरच कपाशीची विक्री करावी.

- हरिभाऊ सवणे, सचिव, बाजार समिती, माजलगाव

आंतरराष्ट्रीय बाजारपेठेत कपाशी गठाणीला मागणी कमी आहे. त्यामुळे दर पडले आहेत. तूर्त तरी भाव वाढण्याची शक्यता नाही.

- रामेश्वर टवाणी, संचालक, मनकॉट कापूस खरेदी केंद्र, माजलगाव