सोलापूर : कोरोनाचा विषाणूने पुणे, सांगली, नगर, सातारा या चारही जिल्ह्यांमध्ये विळखा घालायला सुरवात केली आहे. दुसरीकडे मात्र, या जिल्ह्यांच्या सीमेवरील सोलापूर पंढरीच्या पांडूरंगाच्या कृपेने अद्याप कोरोना या विषाणूपासून दूरच आहे. महसूल, आरोग्य, पोलिस प्रशासनाचे ठोस नियोजन आणि पांडूरंगाच्या कृपेमुळे हे शक्‍य झाल्याचे जिल्हाधिकारी मिलिंद शंभरकर यांनी सांगितले. 

हेही नक्‍की वाचा : रिक्षाचालकाची मानसकन्या बनली गावातील पहिली डॉक्‍टर 

पुणे जिल्ह्यात कोरोनाबाधित रुग्णांची संख्या वाढू लागल्यानंतर जिल्हाधिकारी शंभरकर यांनी पोलिस प्रशासनाला सक्‍त सूचना देत जिल्ह्याच्या सीमा पूर्णपणे बंद केल्या. परजिल्ह्यातून सोलापुरात येणाऱ्या प्रवाशांची काटेकोरपणे तपासणी करुनच काहींना प्रवेश देण्यात आला. तर तहसिलदार, ग्रामसेवक, तलाठी, सरपंचांच्या माध्यमातून परजिल्ह्यातून गावोगावी आलेल्यांना 14 दिवस घरातच थांबावे, असे ठोस नियोजनही केले. महापालिका क्षेत्रातही तशाच उपाययोजना करण्यात आल्या. होम कोरन्टाईचा हातावर शिक्‍का असतानाही त्या व्यक्‍ती बाहेर फिरत असल्याने त्यांच्यावर पोलिसांमार्फत वॉच ठेवला जात आहे. दुसरीकडे सोशल मिडियातून अफवा पसरविणाऱ्यांवर कडक कारवाईही केली जात आहे. आता परजिल्ह्यातून येणाऱ्यांना अजिबात जिल्ह्यात प्रवेश दिला जात नसून गावोगावी समित्या स्थापन करुन नागरिकांवर नजर ठेवली जात आहे. 

हेही नक्‍की वाचा : रेल्वे कर्मचाऱ्यांची सामाजिक बांधिलकी ! 260 कोटींची मदत 

जिल्ह्याच्या सीमा केल्या पूर्णपणे बंद 
परजिल्ह्यातून आलेले 14 दिवस घरातच थांबतील असे नियोजन केले असून गावोगावी गर्दी होणार नाही, याचीही नियमित दक्षता घेतली जात आहे. महसूल, आरोग्य व पोलिस प्रशासनाचे अधिकारी व कर्मचाऱ्यांची चांगली साथ त्यासाठी लाभली आहे. जिल्ह्याच्या सीमा बंद केल्या असून पांडूरंगाच्या कृपेने सोलापूर जिल्हा कोरोना या विषाणूपासून दूर राहिला आहे. 
- मिलिंद शंभरकर, जिल्हाधिकारी, सोलापूर 

हेही नक्‍की वाचा : कोरोना नव्हे वेतनाची लागली चिंता ! एसटी कामगार संघटना आक्रमक 

जिल्हाधिकारी म्हणाले... 

• होम कोरन्टाईलचा शिक्‍का असलेल्यांवर ग्रामस्थ अन्‌ पोलिसांमार्फत वॉच 
• 12 देशापैकी कोणत्याही देशातून प्रवास करुन आलेल्यांवर विशेष लक्ष 
• तालुक्‍यातील खासगी दवाखाने सुरु राहतील, यासाठी तहसिलदारांच्या माध्यमातून नियोजन 
• इंडियन मेडिकल असोसिएशनच्या अध्यक्षांसमवेत चर्चा : शहरातील खासगी दवाखाने झाले सुरु 
• सोडिअम हायपोक्‍लोराईडचा पुरेसा साठा : गरज भासल्यास गावोगावी फवारणीची व्यवस्था