सोलापूर : विद्यापीठांमधील व त्याअंतर्गत येणाऱ्या महाविद्यालयांमधील विद्यार्थी रॅगिंगचा बळी ठरू नयेत, या हेतूने प्रत्येक विद्यापीठ व महाविद्यालयांमध्ये रॅगिंगविरोधी समिती स्थापन करणे बंधनकारक आहे. तसे निर्देश सर्वोच्च न्यायालयाने विद्यापीठ अनुदान आयोगाला दिले आहेत. दरमहा समितीची बैठक घ्यावी, असे आदेश विद्यापीठ अनुदान आयोगाने दिले असतानाही पुण्यश्‍लोक अहिल्यादेवी होळकर सोलापूर विद्यापीठातील समितीने नऊ महिन्यांपासून एकही बैठक घेतली नाही. याबाबत प्रभारी प्र-कुलगुरु डॉ. विकास कदम अनभिज्ञच आहेत. 

हेही वाचा : सोलापूर महापालिकेचा हवा प्रदूषण नियंत्रणासाठी 'हा' ऍक्‍शन प्लॅन 

महाविद्यालयात अथवा विद्यापीठात शिक्षण घेताना, वस्तीगृहात राहायला असलेल्या विद्यार्थ्यांना रॅगिंगचा त्रास होणार नाही, याची दक्षता रॅगिंग विरोधी समितीच्या माध्यमातून घेतली जाते. विद्यार्थ्यांना थेट तक्रार करता यावी, यासाठी रॅगिंग विरोधी समितीच्या सदस्यांचे मोबाइल क्रमांक, त्यांची नावे प्रत्येक महाविद्यालयात, विद्यापीठाच्या प्रत्येक विद्याशाखेच्या इमारतीत लावणे आवश्‍यक आहे. मात्र, विद्यापीठाच्या सोशल सायन्स विभागाच्या इमारतीत मागील कित्येक वर्षांपूर्वीच्या रॅगिंग विरोधी समितीचा फलक तसाच आहे. रॅगिंग विरोधी समिती आहे की नाही, त्यामध्ये कोण आहे, रॅगिंग विरोधी समितीतील सदस्यांना संपर्क कसा करायचा, असे अनेक प्रश्‍न विद्यार्थ्यांना पडले आहेत. तरीही विद्यापीठातील रॅगिंग विरोधी समितीने मागील नऊ महिन्यांपासून त्याकडे गांभीर्याने पाहिल्याचे दिसत नाही. विविध कार्यक्रम व महोत्सवाचे कारण पुढे करीत बैठक घेणे शक्‍य झाले नसल्याचे विद्यापीठाकडून सांगण्यात येत आहे. 

हेही वाचा : 'फास्ट टॅग'नंतरही सुटेना वाहतूक कोंडी 

ठळक बाबी... 

• विद्यापीठाची समिती अन्‌ समितीचे नियोजन कागदोपत्रीच 
• नऊ महिन्यात शहरातील फक्‍त 13 महाविद्यालयांनाच भेटी 
• दरमहा अथवा तीन महिन्यातून एकदा रॅगिंगविरोधी समितीची बैठक नाहीच 
• मागील नऊ महिन्यात विद्यापीठाने बैठकच घेतली नाही 
• रॅगिंगविरोधी समितीतील सदस्यांची नावे अन्‌ मोबाइल क्रमांकाचा विद्यापीठाला विसर 

हेही वाचा : राज्यातील शिक्षकांच्या उन्हाळी सुट्टीला खो...हे आहे कारण ? 

प्रभारी प्र-कुलगुरु रॅगिंगविरोधी समितीबाबत अनभिज्ञ 
राज्यस्तरीय क्रिडा महोत्सव, अविष्कार मोहत्सव, व्यवस्थापन समितीची बैठक यासह अन्य कार्यक्रमांमुळे रॅगिंग विरोधी समितीची बैठक झाली की नाही, याची माहिती नाही. 2019-20 या वर्षातील रॅगिंग विरोधी समितीची बैठक पुढील महिन्यात घेतली जाईल. समिती स्थापन झाली की नाही, त्यामध्ये सदस्य कोण आहेत, याची माहिती घेवून पुढील आठवड्यात बैठक घेतली जाईल, असे प्रभारी प्र कुलगुरु डॉ. विकास कदम यांनी 'सकाळ'शी बोलताना सांगितले.