पुणे : यंदाच्या पावसाळ्यात खडकवासला प्रकल्पातून मुठा नदीत आजअखेर 8.35 टीएमसी पाण्याचा विसर्ग करण्यात आला आहे. दरम्यान, सोलापूर जिल्ह्यातील उजनी धरणात सुमारे 50 टीएमसी (93 टक्के) पाणीसाठा झाला आहे. 

- Rainfall : गेल्या २४ तासात महाबळेश्वरमध्ये सर्वाधिक पावसाची नोंद!

खडकवासला प्रकल्पातील चार धरणांपैकी वरसगाव, पानशेत आणि खडकवासला ही तीन धरणे पूर्ण भरलेली असून, टेमघर धरणातही सुमारे 90 टक्के पाणीसाठा झाला आहे. या चारही धरणांची उपयुक्त पाणीसाठा क्षमता 29.15 टीएमसी असून, सध्या 28.77 टीएमसी साठा झाला आहे. संपूर्ण प्रकल्प भरण्यासाठी केवळ 0.38 टीएमसी पाण्याची गरज आहे.

खडकवासला धरणातून काल रात्रीपासून विसर्ग वाढविण्यात आला आहे. शनिवारी सायंकाळी मुठा नदीपात्रात 9 हजार 416 क्‍युसेक आणि कालव्यातून 1054 क्‍युसेकने विसर्ग सुरु आहे. पानशेत धरणातून तीन हजार 908 क्‍युसेक आणि वरसगाव धरणातून चार हजार 441 क्‍युसेकने विसर्ग सुरू आहे. 

- विद्यार्थ्यांच्या खात्यात आठवडाभरात पैसे जमा होणार; धनंजय मुंडे यांची घोषणा​

भाटघर, नीरा देवघर, वीर, मुळशी, कळमोडी, आंद्रा, आणि नाझरे ही धरणे पूर्ण भरली आहेत. तर, पिंपळगाव जोगे, माणिकडोह आणि विसापूर या धरणांत अद्याप 30 ते 45 टक्केच पाणीसाठा आहे.

पाणलोट क्षेत्रात संततधार : 
टेमघर धरणाच्या पाणलोट क्षेत्रामध्ये शनिवारी दिवसभरात 30 मिलिमीटर पाऊस झाला. वरसगाव 26 मिमी, पानशेत 24 मिमी आणि खडकवासला धरणाच्या पाणलोट क्षेत्रात 7 मिमी पावसाची नोंद झाली.

खडकवासला प्रकल्पातील पाणीसाठा टीएमसीमध्ये, कंसात टक्केवारी 
टेमघर 3.33   (89.78)
वरसगाव 12.82   (100)
पानशेत 10.65     (100)
खडकवासला 1.97  (100)

- पुण्याच्या बातम्या वाचण्यासाठी येथे ► क्लिक करा

इतर धरणांतील पाणीसाठा
भामा-आसखेड 6.57     (85.69)
पवना 8.04     (94.45)
मुळशी 18.46   (100)
भाटघर 23.50     (100)
नीरा देवघर 11.73    (100)
वीर 9.41    (100)
उजनी 49.48    (92.36)