पुणे : कोरोनाचे संकट घोंगावत असताना घरोघर जाऊन संशयित रुग्णांचे सर्वेक्षण करणाऱ्या अंगणवाडी सेविकांना मात्र गेल्या दोन महिन्यांपासून राज्य सरकारने मानधन दिले नाही. त्यामुळे लॉकडाऊनच्या परिस्थितीत अंगणवाडी सेविका हवालदिल झाल्या आहेत.
कोरोना महामारीच्या संकटाचे गांभीर्य ओळखा. घरातच रहा, आपल्याकडे काम करणार्‍यांना या काळातील वेतन द्या, असे उपदेशाचे डोस सरकार आणि प्रशासन सर्वांना देत आहे. मात्र, दुसर्‍याला उपदेश देणार्‍या सरकारने स्वतःच्या विभागात तेही कोरोनाच्या लढाईत अग्रभागी असलेल्या अंगणवाडी सेविकांना मानधनाविना ठेवले आहे. अंगणवाडी सेविका आणि मदतनीस यांचे मार्च महिन्याचे मानधन अद्याप अदा करण्यात आलेले नाही. पण मागील फेब्रुवारी महिन्याचे मानधनही थकलेले आहे. त्यामुळे ऐन लॉकडाऊनच्या कालावधीत अंगणवाडी सेविकांसमोर आर्थिक संकट उभे ठाकले आहे.
कोरोनाविषयक सर्व्हे, लोकशिक्षण, सल्ला असे महत्वपूर्ण काम अंगणवाडी सेविकांना अनेक ठिकाणी करावे लागत आहे. कोरोनाशी संबंधित उपचार करणार्‍या डॉक्टर, नर्सेस व सहायक कर्मचारी, आशा वर्कर यांना 50 लाखांचे सुरक्षा कवच जाहीर झाले आहे. ते योग्यच आहे. पण राज्य सरकारने अंगणवाडी कर्मचार्‍यांविषयी भेदभाव करीत निम्म्याच 25 लाखांचे तेही संघटनांच्या मागणीनंतर सुरक्षा कवच देण्याचे प्रस्तावित केले. तसेच, वर्षापूर्वी मिळालेल्या मानधनवाढीचा फरकही अंगणवाडी सेविकांना अद्याप मिळाला नाही.
या संदर्भात प्रकल्प पातळीवर चौकशी केली असता, प्रकल्प अधिकार्‍यांनी हजेरी पत्रके तपासून दिली आहेत, असे सांगितले जाते. महिला व बाल कल्याण आयुक्त कार्यालयाकडून फेब्रुवारी महिन्याच्या मानधनासाठी तरतूद नाही. तर, मार्च महिन्याचे मानधन प्रक्रियेत आहे, असे उत्तर दिले जात आहे. मानधन वाढ फरक काही प्रकल्पात मिळाला, पण काही प्रकल्पांचा कोशागारात पैसे जमा होवूनही अदा होत नाही. त्यामुळे अंगणवाडी सेविका बेजार झाल्या आहेत.
एकीकडे लॉकडाऊनची बंधने दुसरीकडे दैनंदिन खर्चासाठीही पैसे नाहीत. अशा कात्रीत त्या अडकल्या आहेत. यातून राज्य सरकार आणि प्रशासनाने त्वरित मार्ग काढावा. थकीत व नियमित मानधन, वाढ फरकाची रक्कम अंगणवाडी ताईंना त्वरित द्यावी. कोरोनाच्या लढाईतील या सैनिकांना चिंता मुक्त करावे, असे आवाहन अंगणवाडी कर्मचारी सभेचे प्रदेश उपाध्यक्ष नितीन पवार यांनी केली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.