बारामती : शहरातील मतदान केंद्रावर बोगस मतदानासह दादागिरी होण्याची शक्यता नाकारता येत नसल्याने येथील सर्व मतदान केंद्रावर सीसीटीव्ही कॅमेरे बसवावेत. तसेच अतिरिक्त पोलिस बंदोबस्तही पुरवावा, अशी मागणी भाजपचे बारामतीचे उमेदवार गोपीचंद पडळकर यांनी केली.

शनिवारी (ता.19) येथे आयोजित पत्रकार परिषदेत बोलताना त्यांनी मतदानाच्या दिवशी राष्ट्रवादीकडून दादागिरी होण्याची भीती व्यक्त करत प्रत्येक मतदान केंद्रावर कॅमेऱ्याची नजर असावी आणि पोलिसांची अतिरिक्त कुमक असावी, असे मत व्यक्त केले. 

- Vidhan Sabha 2019 : 'रोहितच्या वयाचा असताना लढलो, आता यांचा 'राम' ही शिल्लक राहणार नाही'

भाजपचे प्रदेश उपाध्यक्ष बाळासाहेब गावडे, महानंदचे दिलीप खैरे, शिवसेनेचे जिल्हा प्रमुख अँड. राजेंद्र काळे, माळेगावचे अध्यक्ष रंजन तावरे, चंद्रराव तावरे, जिल्हा सरचिटणीस अविनाश मोटे, प्रशांत नाना सातव, अँड. नितीन भामे आदी उपस्थित होते. 

पडळकर म्हणाले, राज्यात काँग्रेस-राष्ट्रवादीचा किल्ला ढासळणारच आहे, बारामतीतही मतदारांनी परिवर्तनाची हाक दिली असून मी विधानसभेत नक्की जाणार आहे. मला बारामतीकरांच्या माध्यमातून विधानसभा दिसत आहे, तर अजित पवारांना जवळच असलेले ऑर्थर रोडचे कारागृह दिसत आहे. भाजपच्या विकासाच्या राजकारणाला पाठबळ देण्याचे काम बारामतीकर जरुर करतील, भावनिक आवाहनांना मतदार भुलणार नाही. 

- परप्रांतीयांमुळे राज्याचं समीकरण बिघडतंय - राज ठाकरे

बारामती मतदारसंघातील गावागावातून तसेच शहरातूनही मला चांगला प्रतिसाद मिळाला. बारामतीकर मतदार आता परिवर्तनाच्या प्रतिक्षेत आहे. टंचाई निवारणासह कऱ्हा-नीरा नदीजोड प्रकल्पाबाबत मुख्यमंत्री सकारात्मक आहेत, त्यामुळे विकासाच्या मुद्यालाच बारामतीकरांनी पाठबळ द्यावे, असेही आवाहन पडळकर यांनी केले.

- Vidhan Sabha 2019 : शिवसेना अडकली अटीतटीच्या लढाईत, स्वकियांशीही दोन हात