महाळुंगे पडवळ (पुणे) : आंबेगाव तालुक्यातील महाळुंगे पडवळ-सैदवाडी येथील ४० वर्षीय तरुणाला कोरोणाची लागण झाली आहे. त्याच्या संपर्कातील ६ जणांना भीमाशंकर हॉस्पिटलमध्ये क्वारंटाइन केले आहे. तर, उर्वरीत १२ जणांना होम क्वारंटाइन करण्यात आले असून, त्यामध्ये दोन डॉक्टरांचा समावेश आहे. स्थानिक नागरिकांना संसर्ग होऊ लागल्याने ग्रामस्थांचे धाबे दणाणले आहेत.  

पेट्रोल- डिझेलच्या दरावरून पुणेकरांना असाही दिलासा...

मंचर पोलिस ठाणे, महाळुंगे पडवळ ग्रामपंचायत, प्राथमिक आरोग्य केंद्र, पंचायत समिती, तहसील कार्यालय घोडेगाव आदी कार्यालयांमार्फत गावात चांगल्या उपाय योजना केल्या होत्या. मंचर पोलिस ठाणे व पोलिस पाटील यांच्यामार्फत बाहेरगावाहून आलेल्या नागरिकांच्या काटेकोरपणे नोंदी घेऊन त्यांना होम क्वारंटाइन केले जात होते. आरोग्य केंद्रातील कर्मचारी जनजागृतीचे काम करत होते. परंतु, चार ते पाच दिवसांपूर्वी मंचर येथील एका व्यापाऱ्याकडे येथील तरुण वस्तू खरेदीसाठी व नामांकित बँकेच्या एटीएममध्ये पैसे काढण्यासाठी गेला होता. त्यानंतर तरुणाला थकवा व अंग दु:खीचा त्रास जाणवू लागला होता. महाळुंगे पडवळ येथील एका खासगी दवाखान्यात त्याने उपचार देखिल घेतले होते. महाळुंगे पडवळ प्राथमिक आरोग्य केंद्रातील डॉक्टरांनी तरुणाच्या घशाचा नमुना कोवीड १९ तपासणीसाठी पाठविला होता. नुकताच तो अहवाल पॉझिटिव्ह आला आहे.

कोंढापुरीत पर्यावराणासाठी झटताहेत ग्रामस्थ

मंचर परिसरातच तरुणाला लागण झाल्याचा संशय व्यक्त करण्यात आला आहे. तरुणाच्या संपर्कातील 6 कुटुंबियांना मंचर- घोडेगाव रस्त्यावरील भीमाशंकर हॉस्पिटल येथे क्वारंटाइन करण्यात आले आहे. तर, उर्वरीत १२ जणांना होम क्वारंटाइन केले आहे. त्यांचे कोवीड १९ चे नमुने तपासणीसाठी पुणे येथे पाठविण्यात आले आहेत. २४ तासानंतर सदर अहवाल प्राप्त होतील. या तरुणाच्या घराचे ग्रामपंचायतीमार्फत निजंतुकीकरण केले आहे. खबरदारीचा उपाय म्हणून सैदवाडीकडे येणारे रस्तेही बंद करण्यात आले असून गावातील दुकाने व्यावसायिकांनी स्वंयस्फूर्तीने बंद केली आहेत. पोलिस निरीक्षक कृष्णदेव खराडे, पोलिस नाईक राजेंद्र हिले आदींनी पाहणी केली आहे.

कोरोनाचा रिपोर्ट पाॅझिटिव्ह आल्याचे एेकूनच आला हार्ट अॅटॅक

सर्दी, खोकला, घसा दु:खी, ताप व अंग दु:खी असणाऱ्या नागरिकांनी प्राथमिक आरोग्य केंद्राशी संपर्क साधावा. ग्रामस्थांनी घाबरुन जाऊ नये. वेळोवेळी हात धुवून मास्क व सॅनिटायझरचा वापर करावा, असे आवाहन महाळुंगे पडवळ प्राथमिक आरोग्य केंद्राचे वैद्यकीय अधिकारी डॉ. अशिष गिते व आरोग्य सहाय्यक डॉ.भास्कर साबळे यांनी केले आहे.