पुणे : गावची पिण्याच्या पाण्याची टाकी आणि आमच्या दलितवस्तीचे अंतर जवळजवळ एक किलोमीटरचे आहे. दलित वस्तीला वेगळी पाणी योजनाच नाही. त्यामुळे गेल्या कित्येक वर्षांपासून आम्ही डोस्क्यावर हंडा घेऊन पाणी आणित आहोत. घरात पाण्याचा नळ झाल्यास लई बरं होईल. यामुळं आमच्या डोस्क्यावरील हंड्याचा भार कायमचा कमी होईल, असे दौंड तालुक्यातील पाटस येथील गृहिणी वंदना खारतुडे सांगत होत्या.

जिल्हा परिषदेच्या सामाजिक न्याय विभागाने जिल्ह्यातील दलित वस्त्यांमध्ये घरां-घरात पिण्याच्या पाण्यासाठी नळजोडणी देण्याचा निर्णय घेतला आहे. या निर्णयाचा दलित वस्त्यांमधील महिलांना फायदा होईल का, या अनुषंगाने खारतुडे बोलत होत्या. ही झाली दलित वस्त्यांमधील गृहिणींची प्रातिनिधिक प्रतिक्रिया, पण दूर अंतरावरून पाणी आणाव्या लागणाऱ्या सर्वच महिलांच्या या भावना आहेत, असेही त्यांनी यावेळी सांगितले.

- खासदार डॉ. कोल्हेंनी दिला कानमंत्र; 'कोरोनामुक्त असल्याच्या भ्रमात राहू नका!'​

या निर्णयाचा जिल्ह्यातील सुमारे एक लाख कुटुंबांना लाभ होईल, असा प्राथमिक अंदाज जिल्हा परिषदेच्या सामाजिक न्याय विभागाच्या सभापती सारिका पानसरे यांनी वर्तविली आहे. त्या म्हणाल्या, "जिल्ह्यातील नेमक्या किती कुटुंबांकडे नळ जोडणी उपलब्ध नाही, यांची निश्र्चित आकडेवारी उपलब्ध नाही. त्यामुळे जिल्ह्यातील सर्व दलित वस्त्यांमधील कुटुंबांचे याबाबत सर्वेक्षण करण्यात येत आहे. येत्या दोन आठवड्यात हे सर्वेक्षण पूर्ण केले जाणार आहे.

या सर्वेक्षणानुसार नळजोडणी नसलेल्या सर्व कुटुंबांना येत्या २०० दिवसांत  नळ जोडणी उपलब्ध करून देण्यात येणार आहे. पुणे जिल्ह्यात एकूण ३ हजार ६८५ दलित वस्त्या आहेत. यामध्ये प्रत्येकी सरासरी ५० कुटुंब वास्तव्यास आहेत. यानुसार एकूण सुमारे १ लाख ८५ हजारांच्या आसपास कुटुंब असतील, अशी शक्यता आहे.

- पुणे-सातारा जिल्ह्यातील शेतकऱ्यांना दिवसा वीज मिळणार; सौरप्रकल्प ठरणार वरदान!​

ग्रामीण पाणीपुरवठा विभाग, आदिवासी विभाग, जलजीवन मिशन, पंधरावा वित्त आयोग आणि सामाजिक न्याय विभागाच्यावतीने संयुक्तपणे   या नवीन उपक्रमाची अंमलबजावणी केली जाणार आहे.

जिल्ह्यातील दलित वस्त्यांची सद्य:स्थिती :

- एकूण ग्रामपंचायती - १ हजार ४०७.

- दलित वस्त्यांची संख्या - ३ हजार ६८५.

- दलित वस्त्यांमधील कुटुंबांची संख्या - सुमारे १ लाख ८५ हजार (सर्वेक्षण चालू).

- सध्या नळजोडणी नसलेल्या कुटुंबांची संख्या - सुमारे १ लाख.

जिल्ह्यातील सर्व दलित वस्त्यांमधील नळजोडणी नसलेल्या कुटुंबांचे सर्वेक्षण केले जात आहे. यामध्ये नळजोडणी नसल्याचे आढळून आलेल्या सर्व कुटुंबांना नळजोडणी दिली जाणार आहे. येत्या २० मार्चला एकाचवेळी सर्व नळजोडण्यांचे लोकार्पण करण्याचे नियोजन केले आहे.
- सारिका पानसरे, सभापती, सामाजिक न्याय विभाग, जिल्हा परिषद, पुणे.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)