पुणे -: पुणे आणि पिंपरी-चिंचवड शहरातील वाहतुकीची कोंडी फोडण्यासाठी महाराष्ट्र राज्य रस्ते विकास महामंडळाकडून (एमएसआरडीसी) हाती घेण्यात आलेल्या पश्‍चिम भागातील रिंगरोडच्या भूसंपादनाला राज्य सरकारने बुधवारी मान्यता दिली. त्यामुळे पहिल्या टप्प्यातील वरवे बुद्रूक (ता. भोर) ते उर्से (ता. मावळ) या दरम्यानच्या सुमारे 68 किलोमीटर लांबीचा रिंगरोड मार्गी लागण्याच्या दृष्टीने अत्यंत महत्त्वपूर्ण पाऊल पडले असल्याचे मानले जात आहे. 

होळकरांची वास्तू रयतकडून ताब्यात घ्यावी; आमदार पडळकरांची मागणी

"एमएसआरडीसी'च्या माध्यमातून पूर्व आणि पश्‍चिम अशा दोन भागात रिंगरोड विकसित करण्यात येणार आहे. त्यापैकी पहिल्या टप्प्यातील पश्‍चिम भागातील मावळ, मुळशी, खेड, हवेली, पुरंदर आणि भोर या तालुक्‍यातून हा रिंगरोड जाणार आहे. त्यानुसार शासनाने रिंगरोडसाठी जागा संपादन करण्यासाठी संबंधित प्रांताधिकारी यांची नियुक्ती केली आहे. तर भूसंपादनासंबंधित वाद मिटविण्यासाठी लवाद म्हणून पुणे विभागीय आयुक्त यांची नेमणूक केली आहे. रिंगरोडबाबत नागरिकांच्या असलेल्या हरकती या प्रातांधिकारी यांच्याकडे सादर करता येणार आहेत. "एमएसआरडीसी'ने हाती घेतलेल्या रिंगरोडला यापूर्वीच राज्य सरकारकडून मान्यता दिली असून, त्याला "राज्य महामार्गाचा दर्जा' मिळाला आहे. या प्रस्तावित रिंगरोडची एकूण लांबी सुमारे 172 किलोमीटर असून, तो 110 मीटर रुंदीचा आहे. त्यासाठी 2300 हेक्‍टर जागेची आवश्‍यकता असून, प्रकल्पासाठी सुमारे 14 हजार कोटींचा खर्च अपेक्षित आहे. 

धक्कादायक ! कात्रज प्राणीसंग्रहालयातील ४ हरणांची 'शिकार'; जबाबदार कोण?

या रिंगरोडच्या मधोमध तीस मीटर रुंदीची जागा राखीव ठेवण्यात आली आहे. पहिल्या टप्प्यात साठ मीटरचा रिंगरोड करण्यात येणार आहे. भविष्यात गरज पडल्यास रिंगरोडची रुंदी वाढणे शक्‍य व्हावे, हा देखील त्यामागे उद्देश आहे. दोन टप्प्यात तो विकसित करण्याचा निर्णय "एमएसआरडीसी'ने घेतला आहे. सर्व्हेक्षणापासून ते सर्व प्रकारच्या मान्यता या रिंगरोडसाठी मिळालेल्या आहेत. गेल्या महिन्यात उपमुख्यमंत्री अजित पवार यांच्या समवेत झालेल्या बैठकीत रिंगरोडसाठी भूसंपादनाची प्रक्रिया सुरू करावी, असे आदेश त्यांनी "एमएसआरडीसी'ला दिले होते. त्यानंतर भूसंपादनाच्या प्रक्रियेला गती मिळाली असून, आता अधिसूचना प्रसिद्ध करण्यात आली आहे. 

 'आम्हाला परिस्थितीची जाणीव आहे, पण...'; शेतकरी आंदोलनावर सुप्रीम कोर्टानं व्यक्त केली चिंता

पश्‍चिम भागातील मार्ग 
केळवडे, वरवे बुद्रूक, कांजळे, खोपी, कुसगाव, रांजे, रहाटवडे, कल्याण, घेरासिंहगड, खासगाव, मावळ, वरदाडे, मालखेड, मांडवी बुद्रुक, सांगरूण, बहुली, कातवडी, मारणेवाडी, आंबेगाव, उरावडे, कासार अंबोली, भरे, आंबडवेट, घोटावडे, रिहे, केससेवाडी, पिंपलोळी, पाचणे, चांदखेड, बेंबड ओहोळे, धामणे, परंदवाडी, उर्से. चार तालुक्‍यातील 34 गावातून हा रिंगरोड प्रस्तावित करण्यात आला आहे.