पुणे : रसिकांचे रंजन करणारी संगीताची मैफल सुनी झाली, नटरंग बेरंग झाला...कोरोनामुळे अवघे सांस्कृतिक क्षेत्र ठप्प झाले. सुमारे शंभर कोटी रुपयांची उलाढाल शून्य झाली. या सांस्कृतिक मैफलीच्या डोही आनंदतरंग उमटण्याची अजूनही चिन्हे नाहीत.
पुणे ही महाराष्ट्राची सांस्कृतिक राजधानी. महापालिका आणि खासगी अशा वीसेक नाट्यगृहांमध्ये नाटक, संगीत, लावणी यांसह वैविध्यपूर्ण सांस्कृतिक आविष्कार वर्षभर अनुभवण्याची पुणेकरांची सवय, पण गेले तीन महिने ही मैफल सुनी आहे. इथे ना नाटकाचे प्रवेश होताहेत, ना संगीताचे स्वर गुंजत आहेत. कलाकारांच्या हाती काम नाही, पडद्यामागील कलाकारांचे जगणे मुश्कील झाले आहे. त्यामुळे आता सांस्कृतिक क्षेत्राला चालना मिळण्याची गरज या क्षेत्रातून व्यक्त होते आहे.
राज्यभरातील नाट्यगृहांमध्ये रंगणारी नाटके, सांगीतिक मैफली, लावण्याचे कार्यक्रम आदी गेली तीन महिने बंद आहेत. मार्चपासून पुढचा काळ हा या क्षेत्रासाठी उत्तम मानला जातो, पण याच काळात लॉकडाऊन झाल्याने सुमारे शंभर कोटी रुपयांची उलाढाल ठप्प झाल्याचे या क्षेत्रातील जाणकार सांगतात. आगामी गणेशोत्सव, दिवाळीमध्येही फारसे कार्यक्रम होणार नाहीत, अशी चिंता देखील व्यक्त केली जात आहे.
नाट्यनिर्माते श्रीपाद कुलकर्णी म्हणतात, "नाटकांना अनुकूल असणाऱ्या काळातच लॉकडाऊन आल्याने मोठा फटका व्यवसायाला बसला आहे. एकट्या नाट्यक्षेत्राची अपेक्षित असलेली 40-50 कोटी रुपयांची उलाढाल ठप्प झाली आहे. कोरोनाचे संकट अधिक गंभीर होत आहे, त्यातून सावरण्यास आणखी दोन महिने तरी लागतील. तोपर्यंत सांस्कृतिक क्षेत्राला वाट मात्र पाहावी लागेल. परंतु नाट्यगृहे कशाप्रकारे आणि कधी सुरू करता येतील, यासाठी प्रशासनाने सर्वेक्षण करावे.
संवाद पुणे या संस्थेचे सुनील महाजन यांनी नाट्यगृहे सुरू करण्यासाठी प्रयत्न सुरू केले आहेत. ते म्हणाले, "नाट्यगृहे तीन महिने बंद असल्याने त्यातील वातानुकूलन यंत्रणा, ध्वनी यंत्रणेत दोष निर्माण होण्याची शक्यता आहे. पुढील काळातही नाट्यगृहे बंद राहिली, तर देखभालीवर कोट्यवधी रुपयांचा खर्च करावा लागेल. त्यामुळे नाट्यगृहांची ही खबरदारी घेऊन सुरू व्हायला हवीत.
- पुण्याच्या बातम्या वाचण्यासाठी येथे क्लिक करा
पुणे आणि मुंबईत कोरोनाचा प्रादुर्भाव वाढतो आहे. त्याचा भर ओसरला की नाट्यगृहे सुरू करण्याबाबत सर्वानुमते निर्णय व्हावा. लॉकडाऊनमुळे या क्षेत्रालाही मोठा फटका बसला आहे. त्यामुळे सरकारने मदत करण्याबाबतही विचार करावा. ज्यामुळे या क्षेत्राला उभारी मिळण्यास मदत होईल.
- प्रशांत दामले (अभिनेता)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.