पुणे : उच्च शिक्षण संचालक कार्यालयातील महिला कर्मचाऱ्यांशी संचालक डॉ. धनराज माने यांनी असभ्य भाषेत वर्तन केल्याच्या प्रकरणाची निवृत्त न्यायाधीशांमार्फत चौकशी केली जाईल, असे आश्वासन राज्याचे उच्च व तंत्र शिक्षण मंत्री उदय सामंत यांनी दिले आहे. तसेच माने यांनी दिलगिरी व्यक्त केल्याने त्यांच्या विरोधातील आंदोलन कर्मचाऱ्यांनी मागे घेतले आहे. 

- Video : बापरे! केवढी ही गर्दी; दिवाळीच्या खरेदीसाठी पुण्यात गर्दी उसळली​

डाॅ. धनराज माने यांनी त्यांच्या कार्यालयातील मुख्य लिपीत स्वाती वेदपाठक यांना २९ ऑक्टोबर रोजी कार्यालयातील कामकाजावरून अपशब्द वापरले होते. त्यामुळे कार्यालयातील कर्मचारी सोमवारी (ता.२) कामावर येताच त्यांनी माने यांच्यावर कारवाई करा, अशी मागणी करत काम बंद आंदोलन सुरू केले. वेदपाठक यांनी याविरोधात उच्च शिक्षण विभागाच्या अपर मुख्य सचिवांकडे तक्रार केली होती. माने यांच्यावर कारवाई झाल्याशिवाय हे आंदोलन मागे घेतले जाणार नाही, असा इशारा कर्मचारी संघटनेने दिलेला होता. 

- वर्ष उलटून गेलं तरी दुसरी यादी जाहीर होईना; 'पीएचडी'च्या विद्यार्थ्यांची प्रतिक्षा कायम​

या पार्श्वभूमीवर उदय सामंत यांनी महाराष्ट्र राज्य शिक्षण विभाग सरकारी कर्मचारी महासंघासोबत बैठक घेतली. त्यामध्ये झालेला प्रकार ऐकून घेत या प्रकरणाची निवृत्त न्यायाधीशांमार्फत चौकशी केली जाईल, असे आश्वासन कर्मचाऱ्यांना देण्यात आले. तसेच माने यांच्याकडून संचालक कार्यालयातील कोणत्याही कर्मचाऱ्यावर तेरावी अरेरावी व द्वेषपूर्ण वागणूक दिली जाणार नाही असेही सांगितले. डॉ. धनराज माने यांनी महिलेसोबत असभ्य वर्तन केल्याचे मान्य करून याबाबत दिलगिरी व्यक्त केली.

- राम मंदिर निकालाची वर्षपूर्ती साजरी करण्यास मनाई; अयोध्येतील सर्व कार्यक्रम रद्द​

महाराष्ट्र राज्य शिक्षण विभाग सरकारी कर्मचारी महासंघाचे अध्यक्ष राम टाकळकर यांनी पत्रक काढून माहिती दिली आहे. उदय सामंत यांनी दिलेल्या आश्वासनाचा मान राखण्यासाठी आणि उच्च शिक्षण संचालक कार्यालयातील कामाचा होत असलेला खोळंबा, विद्यार्थी हिताचा विचार करून हे आंदोलन मागे घेत असल्याचे टाकळकर यांनी निवेदनात नमूद केले आहे. 

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)