नारायणगाव : प्राथमिक शिक्षण सेवा संघ नारायणगाव या नावाने असलेली येथील सिटी सर्वे नंबर १४६३ मधील तीस गुंठे जागा २९ जुलै १९६४ रोजी खरेदी केलेली आहे. शाळेसाठी खरेदी केलेल्या या जागेवर पुणे जिल्हा परिषदेला हक्क सांगता येणार नाही. या संदर्भात जमाबंदी आयुक्त व भूमी अभिलेख महाराष्ट्र राज्याचे संचालक, पुणे यांनी दिलेला निकाल एकतर्फी आहे. या निकालाच्या विरोधात महसूलमंत्री राज्य शासन यांच्याकडे अपील केले आहे. अशी माहीती शिवाई ज्ञान मंदिर शिक्षण संस्थेचे अध्यक्ष चंद्रशेखर कोऱ्हाळे यांनी पत्रकार परीषदेत दिली.

महत्त्वाची बातमी : मुंबईची लाईफलाईन लोकल ट्रेन कधी होणार सुरू? बड्या मंत्र्यानं दिलं 'हे' उत्तर

नारायणगाव ग्रामपंचायतीचे सरपंच योगेश पाटे यांनी १४ जानेवारी २०२० रोजी पत्रकार परीषद घेऊन सिटी सर्वे नंबर १४६३ मधील तीस गुंठे जागा जमाबंदी आयुक्त व भूमी अभिलेख महाराष्ट्र राज्याचे संचालक,पुणे यांनी दिलेल्या निकालानुसार पुणे जिल्हा परिषदेची झाली असून, या जागेत सुरू असलेल्या शिवाई ज्ञान मंदिर शाळेचे अन्य ठिकाणी स्थलांतर करावे. असे अावाहन केले होते. या मुळे जागेच्या मालकी हक्का संदर्भात कोऱ्हाळे यांनी पत्रकार परीषद घेऊन खुलासा केला.

हेही वाचा : सुशांतची एक्स गर्लफ्रेंडवर गंभीर आरोप, अंकितानं दिलं 'असं' सडेतोड प्रतिउत्तर

या बाबत कोऱ्हाळे म्हणाले, ''शाळा सुरू करण्याच्या उद्देशाने पंढरीनाथ कोऱ्हाळे, सोमा कोल्हे यांनी १९६४ साली सिटी सर्वे नंबर १४६३ मधील जागा खरेदी केली होती.दरम्यान १९७० साली ही जागा नारायणगाव ग्रामपंचायतीचे त्या वेळचे सरपंच यांनी 
ग्रामपंचायत दप्तरी जिल्हा परिषद अध्यक्ष ( मराठी शाळा) या नावे केली.या संदर्भात  जिल्हा अधीक्षक भुमीलेख यांच्याकडे अपील केले होते. सुनावणीच्या वेळी जिल्हा परिषद अध्यक्ष तर्फे मुख्य कार्यकारी अधिकारी यांना जागे संदर्भात कोणतीही कागदपत्रे सादर करता आली नाहीत.या मूळे  जिल्हा अधीक्षक भुमीलेख  यांच्या निकाला नुसार ही जागा २६ मे २०११ रोजी प्राथमिक शिक्षण सेवा संघ या नावे करण्यात आली.

दरम्यान जिल्हा परिषद अध्यक्ष तर्फे मुख्य कार्यकारी अधिकारी यांनी या निर्णयाच्या विरोधात जमाबंदी आयुक्त व भूमी अभिलेख महाराष्ट्र राज्याचे संचालक,पुणे यांच्याकडे अपील केले होते. जमाबंदी आयुक्त व भूमी अभिलेख महाराष्ट्र राज्याचे संचालक,पुणे  यांनी आम्हाला सुनावणी संदर्भात कोणतीही माहीती न देता एकतर्फी निकाल देऊन ही जागा पुणे जिल्हा परिषद (अध्यक्ष )या नावे करण्याचा एकतर्फी निर्णय दिला.या निर्णयाच्या विरोधात प्राथमिक शिक्षण सेवा संघ नारायणगावच्या वतीने महसूलमंत्री राज्य शासन यांच्याकडे अपील केले आहे.

तसेच जुन्नर न्यायालयात सुद्धा दावा दाखल आहे.जागे संदर्भात वाद न्यायप्रविष्ट असताना सरपंच पाटे यांनी याला राजकीय वळण दिले असल्याचा खुलासा कोऱ्हाळे यांनी केला आहे. या वेळी कोऱ्हाळे यांनी पत्रकार परिषदेत जागेच्या खरेदीची कागदपत्रे सादर केली. जागे संदर्भात सुरू झालेल्या आरोप व प्रत्यारोपा मुळे मागील वीस वर्षापासून कोऱ्हाळे विरुध्द पाटे यांच्यातील राजकिय द्वंद्व पुन्हा सुरू झाले आहे.

(Edited by : Sagar Diliprao Shelar)