Share Market Closing Latest Update 6 May 2024: सोमवारी, देशांतर्गत शेअर बाजारात तीव्र चढ-उतार झाले आणि बाजार सपाट बंद झाला. सार्वजनिक क्षेत्रातील बँका, वित्तीय सेवा, मेटल, कंझ्युमर ड्युरेबल्स, तेल आणि गॅस क्षेत्रांमध्ये मोठी घसरण झाली. निफ्टीवर एफएमसीजी, आयटी आणि फार्मा शेअर्स वधारले. बाजार बंद होताना निफ्टी 33 अंकांनी घसरून 22,442 वर, सेन्सेक्स 17 अंकांनी वाढून 73,895 वर आणि निफ्टी बँक 28 अंकांनी घसरून 48,895 वर बंद झाला.

क्षेत्रीय निर्देशांकाची स्थिती

आजच्या व्यवहारात आयटी, फार्मा, एफएमसीजी, रिअल इस्टेट, हेल्थकेअर क्षेत्रातील शेअर्समध्ये वाढ झाली आहे. परंतु कंझ्युमर ड्युरेबल्स, ऊर्जा, बँकिंग, वाहन, तेल, गॅस, मीडिया आणि मेटल क्षेत्राचे शेअर्स घसरणीसह बंद झाले.

आजच्या सत्रात मिडकॅप आणि स्मॉलकॅप शेअर्समध्ये मोठी घसरण पाहायला मिळाली. सेन्सेक्समधील 30 शेअर्सपैकी 19 शेअर्स वाढीसह आणि 11 शेअर्स घसरणीसह बंद झाले. तर 50 निफ्टी शेअर्सपैकी 23 शेअर्स वाढीसह तर 27 शेअर्स घसरणीसह बंद झाले.

कोणते शेअर्स तेजीत?

आज बाजारात ब्रिटानियाचे शेअर्स 6.60 टक्के, कोटक महिंद्रा बँक 5.02 टक्के, TCS 2.05 टक्के, हिंदुस्थान युनिलिव्हर 1.80 टक्के, सन फार्मा 1.24 टक्के, टेक महिंद्राचे शेअर्स 0.92 टक्के वाढीसह बंद झाले. तर टायटनचे शेअर्स 7.07 टक्के, अदानी एंटरप्रायझेस 4.05 टक्के, कोल इंडिया 3.07 टक्के, बीपीसीएल 2.89 टक्के, एसबीआय 2.64 टक्क्यांनी घसरले.

गुंतवणूकदारांचे मोठे नुकसान

आजच्या व्यवहारात शेअर बाजारात मोठी घसरण झाल्याने गुंतवणूकदारांचे नुकसान झाले आहे. BSE वर कंपन्यांचे मार्केट कॅप 403.50 लाख कोटी रुपयांवर घसरले आहे, जे गेल्या ट्रेडिंग सत्रात 406.24 लाख कोटी रुपये होते. म्हणजेच आजच्या ट्रेडिंग सत्रात गुंतवणूकदारांचे 2.74 लाख कोटी रुपयांचे नुकसान झाले आहे.

बॉम्बे स्टॉक एक्स्चेंज (BSE) वर आज, शेअर्सची संख्या वाढीच्या तुलनेत घसरणीसह बंद झाली. एक्सचेंजमध्ये आज एकूण 4,093 शेअर्सचे व्यवहार झाले. यापैकी 1,292 शेअर्स वाढीसह बंद झाले तर 2,629 शेअर्समध्ये घसरण दिसून आली.

तर 172 शेअर्स कोणतीही हालचाल न करता फ्लॅट बंद झाले. याशिवाय आजच्या व्यवहारादरम्यान 242 शेअर्सनी त्यांच्या 52 आठवड्यांचा उच्चांक गाठला. तर 26 शेअर्सनी त्यांच्या नवीन 52 आठवड्यांच्या नीचांकी पातळीला स्पर्श केला.