दहिवडी (सातारा) : भाजपनं (BJP) शिवसेना फोडून बेगडी राजकारण केलं असं म्हणण्याचा जयंत पाटलांना (Jayant Patil) कोणताही नैतिक अधिकार नसून राष्ट्रवादीनंच शिवसेना (Shiv Sena) अडचणीत आणली, असा स्पष्ट आरोप आमदार शहाजी पाटील (MLA Shahaji Patil) यांनी केला.

विरकवाडी (ता. माण) इथं बैलगाडी शर्यतीच्या (Bullock Cart Race) बक्षीस वितरण प्रसंगी पत्रकारांशी संवाद साधताना ते बोलत होते. आमदार शहाजी पाटील म्हणाले, 'आमची व भाजपची युती नैसर्गिक होती. ही युती अडीच वर्षापूर्वीच मार्गी लागायला पाहिजे होती. परंतु, दुर्देवानं त्यावेळी ती मार्गी लागली नाही. याला जबाबदार राष्ट्रवादी काँग्रेस (NCP) आहे. भाजपनं शिवसेना फोडली म्हणण्यापेक्षा राष्ट्रवादी काँग्रेसनं अख्खी शिवसेना डबऱ्यात घालायचं ठरवलं होतं ते एकनाथ शिंदेंनी वाचवलं त्याचा जळफळाट जयंत पाटील यांना होतोय.'

शहाजीबापू पुढं म्हणाले, अमोल मिटकरी हे पात्र राजकारणात अतिशय नवं आहे. मला तर वाटतं मिटकरीनं संजय राऊत यांना गुरु मानलंय आणि त्यामुळं जे राऊतांचं झालं तेच एकदिवशी मिटकरीचं होणार, असा टोलाही त्यांनी मिटकरींना लगावला.