सातारा : किरकोळ कारणावरून सातारा शहर वाहतूक शाखेतील (Satara City Police) कर्मचाऱ्याचा पाठलाग करत मारहाण केल्‍याप्रकरणी दुचाकीवरून आलेल्‍या चार अज्ञातांवर सातारा शहर पोलिस ठाण्‍यात गुन्‍हा नोंदविण्‍यात आला आहे.

याची तक्रार योगेश कृष्‍णात जाधव (रा. सातारा) या पोलिस कर्मचाऱ्याने नोंदवली आहे. सातारा शहर वाहतूक नियंत्रण शाखेत योगेश जाधव हे कार्यरत आहेत. ते काल सकाळी ११ च्‍या सुमारास वायसी कॉलेज परिसरातून पोवई नाक्‍याकडे दुचाकीवरून येत होते.

त्‍यांचा पाठलाग करत दोन दुचाकीवरून चार युवक त्‍याठिकाणी आले. त्‍यांनी योगेश जाधव यांना अडवले. यानंतर त्‍या चौघांनी तू गल्‍लीत खूप दादागिरी करतो. तुझ्‍याशेजारी राहणाऱ्या दगडू पिसाळ, नितीन पिसाळ यांना दमदाटी करतो, असे म्‍हणत त्‍या चौघांनी योगेश जाधव यांना लाकडी दांडके, लोखंडी पट्टीने मारण्‍यास सुरुवात केली.

मारहाणीत योगेश जाधव यांच्‍या डोक्‍यास दुखापत झाली. मारहाणीनंतर ते चौघेही त्‍याठिकाणाहून निघून गेले. याची तक्रार रात्री जाधव यांनी सातारा शहर पोलिस ठाण्‍यात नोंदवली असून, अज्ञात चौघांवर मारहाणीचा गुन्‍हा नोंदविण्‍यात आला आहे. याचा तपास हवालदार भवारी हे करीत आहेत.