कऱ्हाड : मराठा आरक्षणाचा (Maratha Reservation) मुद्दा सध्या चांगलाच पेटला आहे. मनोज जरांगे-पाटील (Manoj Jarange-Patil) यांच्या उपोषणाला पाठिंबा देण्यासाठी आणि मराठा समाजाला आरक्षण मिळावे, या मागणीसाठी सकल मराठा समाजाच्या वतीने आज सातारा बंदची हाक देण्यात आली आहे.

मात्र, त्याचा धसका एसटी प्रशासनाने (ST Bus) घेतला आहे. कोल्हापूर, सांगली, विटा, तासगावकडून कऱ्हाड, साताऱ्याकडे येणाऱ्या अनेक एसटी बस सकाळच्या टप्प्यात बंद ठेवण्यात आल्या आहेत. त्यामुळे प्रवाशांची मोठी गैरसोय झाली आहे.

मराठा आंदोलनाची धग सध्या वाढत चालली असून हे आंदोलन दिवसेंदिवस अधिक तीव्र होत आहे. त्यासाठी काल कऱ्हाडला मराठा समाजाचा मोर्चा काढण्यात आला. अनेक ठिकाणी जाळपोळ झाल्याच्या घटनाही घडल्या आहेत. मनोज जरांगे-पाटील यांच्या उपोषणाला पाठिंबा देण्यासाठी आणि मराठा समाजाला आरक्षण मिळावे, या मागणीसाठी सकल मराठा समाजाच्या वतीने आज सातारा बंदची हाक देण्यात आली आहे.

त्यामुळे सकाळच्या टप्प्यात सातारा जिल्ह्यात संमिश्र प्रतिसाद मिळाला आहे. दरम्यान, या बंदचा चांगलाच धसका एसटी प्रशासनाने घेतला आहे. बाहेरील आगारातून कऱ्हाड, साताऱ्याला येणाऱ्या काही एसटी बसच्या फेऱ्या बंद ठेवण्यात आल्या आहेत. त्यामुळे दोन्ही आगारात प्रवाशांची सध्या मोठी गर्दी झाली असून बसच नसल्याने त्यांची मोठी गैरसोय होणार आहे.

अनेक बस बायपासने रवाना

कोल्हापूर, बेळगाव, सांगली, तासगाव, विटा, आटपाडी आगाराच्या कऱ्हाड, सातारा मार्गे जाणाऱ्या एसटी बस या सातारा जिल्हा बंदमुळे कऱ्हाड आणि सातारा शहरातील बसस्थानकात न नेता त्या बायपास मार्गाने पुणे-मुंबईला रवाना करण्यात येत आहेत. त्यामुळे बसस्थानकावरील प्रवाशांची मोठी गैरसोय होत आहे.