मोरगिरी (जि. सातारा) : पाटण तालुक्‍यात धरणे बांधून पाणी अडवण्यात आल्यानंतर आता नद्यांवर कोल्हापूर पद्धतीचे बंधारे बांधून पाणी अडवण्याचे नियोजन करण्यात आलेले आहे. यानुसार गृह राज्यमंत्री शंभूराज देसाई यांनी सन 2020-2021 च्या आर्थिक वर्षात यासाठी आवश्‍यक निधी उपल्बध करण्याकरिता राज्याच्या मृद आणि जलसंधारण विभागाकडे मागणी केली आहे. या कामांना लवकरच निधी मंजूर होऊन परिसरातील जलस्त्रोत्रांचे पुनर्भरण आणि भूगर्भातील पाण्याची पातळी वाढण्यास मदत होणार आहे. त्यांच्या पाठपुराव्यामुळे नजीकच्या कालावधीत तालुक्‍यातील गावे पाणीदार बनणार असल्याचे शेतकरी वर्गाने समाधान व्यक्त केले आहे.
पाटण तालुक्‍यात पावसाचे प्रमाण जास्त असले, तरी पिण्याच्या पाण्याचा व शेतीच्या पाण्याचा प्रश्न कायम आहे. यावर मात करण्यासाठी पाटण तालुक्‍यात धरणांची कामे मोठ्या प्रमाणात हाती घेण्यात आली. त्यानुसार नद्यांवर धरणे बांधून पाणी अडवण्यात आले; परंतु धरण प्रशासन हे शासनाच्या नियोजनानुसार उन्हाळ्यात 15- 15 दिवस नदीला पाणी सोडत नाही, त्यामुळे नदीकाठला असणाऱ्या उपसा जलसिंचन योजना, पिण्याच्या पाण्याचा योजना बंद असतात. पाण्याअभावी कृत्रिम पाणीटंचाईचा सामाना जनतेला करावा लागतो.
आता तालुक्‍यातील नद्यांवर कोल्हापूर पद्धतीचे बंधारे बांधून पाणी अडवण्याचे नियोजन करण्यात आल्याने पाण्याचा प्रश्न मिटण्यास मदत होणार आहे. पाटण तालुक्‍यातील ढेबेवाडी विभागातील वांग नदीवर शितपवाडी आणि काळगाव, कुठरे येथील मोरेवाडी, धामणी, बनपुरी, मालदन, उत्तरमांड नदीवर माजगाव येथे, तर मोरणा नदीवर बेलवडे खुर्द, वाडीकोतवडे येथे, तारळी नदीवर नुने आणि बांबवडे येथे कोल्हापूर पद्धतीचे बंधारे बांधण्याचे उद्दिष्ट समोर ठेवले आहे, तर कुंभारगाव येथे साठवण तलाव बांधण्याचा आराखडा तयार करण्यात आलेला आहे.
जलस्त्रोत्रांचे पुनर्भरण, भूगर्भातील पाणीपातळी वाढणार
कोल्हापूर पद्धतीच्या बंधाऱ्यांमुळे जलसंधारण व त्याद्वारे पिकांना थेट संरक्षित पाण्याची सोय करणे, त्याचबरोबर परिसरातील जलस्त्रोत्रांचे पुनर्भरण आणि भूगर्भातील पाण्याची पातळी वाढण्यास मदत होणार आहे. गृह राज्यमंत्री देसाई यांच्या या नियोजनामुळे तालुक्‍यातील गावे पाणीदार बनणार आहेत.
संपादन : बाळकृष्ण मधाळे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.