नाशिक : महाराष्ट्र पोलिस स्थापना दिन अर्थात्‌ रेझिंग डेनिमित्त उपनगर परिसरातील एका शाळेत विद्यार्थ्यांना रिव्हॉल्व्हरची माहिती देत असताना पोलिस अधिकाऱ्याच्या हातून चुकून गोळी सुटली. या गंभीर घटनेत सुदैवाने जीवितहानी झाली नाही; परंतु अचानक झालेल्या या प्रकारामुळे विद्यार्थ्यांमध्ये भीती पसरली होती. 

"रेझिंग डे'च्या कार्यक्रमात असा घडला प्रकार...

रेझिंग डेनिमित्त गुरुवारी (ता. 2) पोलिस आयुक्तालयांतर्गत पोलिस ठाण्यांमध्ये शालेय विद्यार्थ्यांनी भेट दिली, तर काही अधिकाऱ्यांनी शाळांमध्ये भेट देत पोलिसांच्या कामकाजासह बाललैंगिक अत्याचार, सायबर क्राइमची माहिती दिली. या उपक्रमांतर्गत नारायण बापूनगर येथील दि प्रोग्रेसिव्ह एज्युकेशन संस्थेच्या अभिनव आदर्श मराठी शाळेत दुपारी साडेचारच्या सुमारास उपनगरचे वरिष्ठ पोलिस निरीक्षक सुनील रोहोकले पथकासह गेले होते. त्या वेळी विद्यार्थ्यांना माहिती देत असतानाही त्यांच्या कंबरेला रिव्हॉल्व्हर होते. विद्यार्थ्यांना पोलिसांच्या रिव्हॉल्व्हरचे नेहमीच आकर्षण असते. त्यामुळे रोहोकले रिव्हॉल्व्हर काढून त्याची माहिती देत होते. त्याच वेळी त्यांच्याकडून रिव्हॉल्व्हरची कळ दाबली गेली आणि लोडेड असलेल्या रिव्हॉल्व्हरमधून गोळी सुटली. सुटलेली गोळी शाळेच्या छताला लागली. मात्र अचानक झालेल्या या घटनेमुळे शाळेत अचानक भीतीचे वातावरण निर्माण झाले. विद्यार्थीही घाबरून गेले होते. 

उपनगर पोलिस निरीक्षकावर कारवाईची शक्‍यता 

या घटनेत गोळी छताला लागल्याने मोठा आवाज झाला. छताला दोन छोटी भोकेदेखील पडली. या वेळी काहीसा धूर अन्‌ जळकट दुर्गंधी पसरली होती. नववी, दहावी अ आणि ब तुकडीमधील विद्यार्थ्यांना सुरक्षेविषयी काळजी कशी घ्यावी, तसेच मुलींना छेडछाडीच्या घटनेला सामोरे जावे लागल्यास त्यापासून सुटका कशी करून घ्यावी, या विषयाचे धडे विद्यार्थ्यांना पोलिस देत होते. यादरम्यान विद्यार्थ्यांना रिव्हॉल्व्हरची माहिती दिली जात होती. 

हेही वाचा > रात्रीचा 'तिचा' प्रवास...उद्यानात दारूच्या पार्ट्या रंगताना 'ते' तिला बघतात..अन् मग...

डमी गोळीबाबत उलटसुलट चर्चा 
दरम्यान, शाळेत घबराट पसरल्याने पालकांनी याबाबत चौकशी केली असता, रिव्हॉल्व्हरमधून सुटलेली गोळी डमी असल्याचे सांगण्यात आले. मात्र, विद्यार्थी-पालकांत उलटसुलट चर्चा होती. गोळी डमी असेल, तर छताला भोक कसे पडले? शाळा अन्‌ पोलिस खऱ्या घटनेवर पांघरूण घालत आहेत, असे बहुतांश पालक वर्गाचे म्हणणे आहे. श्री. रोहोकले यांना विचारले असता, त्यांनी शाळेत कार्यक्रम झाल्याचे मान्य केले. पण, रिव्हॉल्व्हरमधून सुटलेल्या गोळीबाबत ठोस उत्तर मात्र दिले नाही. 

हा मिसफायरचा प्रकार... 
उपनगर येथे मिसफायरचा प्रकार घडला आहे. त्याबाबत माहिती मागविली आहे. नेमका प्रकार कसा झाला हे समजेल. त्यानंतरच त्यावर ठोस बोलता येईल. - विश्‍वास नांगरे-पाटील, पोलिस आयुक्त 

हेही वाचा > राष्ट्रवादी काँग्रेस एका ज्येष्ठ मार्गदर्शकाला मुकला - छगन भुजबळ

हेही वाचा > संशयिताला पकडताना झाली झटापट...त्यात वरिष्ठ पोलिस निरीक्षकाचेच मात्र..