Dhule News: धुळेकरांना रेल्वेने पुणे येथे जाण्यासाठी अमरावती-पुणे रेल्वेच्या वेळेनुसार धुळे-चाळीसगाव रेल्वेच्या नियमित वेळेत बदल करून चाळीसगावपर्यंत प्रवाशांना जाता येईल. तसेच पुढे अमरावती-पुणे रेल्वेने चाळीसगाव येथून पुण्याचा प्रवास करता येईल, या दृष्टीने धुळे ते पुणे रेल्वेसाठी प्रयत्न सुरू असल्याचे खासदार डॉ. सुभाष भामरे यांनी सांगितले.

शहरातील रेल्वेस्थानकावर सोमवारी (ता. १३) सकाळी साडेसहाला खासदार डॉ. भामरे यांनी धुळे-सीएसटी (मुंबई) रेल्वेचा हिरवी झेंडी दाखवून प्रारंभ केला. त्या वेळी ते बोलत होते. (Dhule CST railway started dhule news)

महापौर प्रतिभा चौधरी, भाजपचे शहर-जिल्हाध्यक्ष गजेंद्र अंपळकर, स्टेशन प्रबंधक संतोष जाधव, नगरसेवक हर्षकुमार रेलन, राजेश पवार, शशी मोगलाईकर, काँग्रेसचे ज्येष्ठ मुकुंद कोळवले आदी उपस्थित होते.

धुळे-मुंबई रेल्वे नियमित धावणार असल्याने प्रवाशांनी समाधान व्यक्त केले. आता धुळे-मुंबई-धुळे रेल्वेसेवा नियमित झाली आहे. याकामी खासदार डॉ. भामरे यांनी रेल्वेमंत्री अश्विनी वैष्णव व रेल्वे राज्यमंत्री रावसाहेब दानवे यांच्याकडे मागणी करीत पाठपुरावा केला.

धुळे-मुंबई रेल्वेला एकूण १६ बोगी आहेत. पैकी १६ बोगींमध्ये एक स्लीपर कोचचा समावेश आहे. तसेच नॉन एसीच्या पाच, तर आठ जनरल बोगी आहेत. स्लीपर कोचचे प्रवासी भाडे ५३५ रुपये, नॉन एसीसाठीचे भाडे दीडशे, तर जनरल बोगीचे भाडे १३५ रुपये आहे. ११०१२ धुळे-सीएसटी ही रेल्वे रोज सकाळी साडेसहाला धुळ्याहून निघून दुपारी सव्वादोनला सीएसटीला पोचेल.

तसेच ११०११ सीएसटी- धुळे ही रेल्वे रोज दुपारी बाराला सीएसटी येथून निघून रात्री ८.५५ ला धुळ्याला पोचेल. या रेल्वेला शिरूड, जामदा, चाळीसगाव, नांदगाव, मनमाड, लासलगाव, निफाड, नाशिक रोड, इगतपुरी, कल्याण, ठाणे, दादर स्थानकांवर थांबा असेल.