शिक्षणाधिकाऱ्यांच्या दालनाबाहेर शिक्षकांचा पगारासाठी ठिय्या
जळगाव: "जामनेर तालुका एज्युकेशन सोसायटी' या शिक्षण संस्थेतील दोन संचालक मंडळांच्या वादात न्यू इंग्लिश स्कूलच्या कर्मचाऱ्यांचे पगार गेल्या दोन महिन्यांपासून रखडले आहेत. शंभर ते सव्वाशे कर्मचारी पगारापासून वंचित आहेत. त्यामुळे आर्थिक टंचाई भासून उपासमारीची वेळ आल्याने मंगळवारी शिक्षकांनी "सीईओं'कडे कैफियत मांडली. तसेच माध्यमिक शिक्षणाधिकाऱ्यांच्या दालनासमोर ठिय्या आंदोलन केले.
जामनेर तालुका एज्युकेशन सोसायटीच्या न्यू इंग्लिश मीडियम स्कूलच्या शिक्षकांनी आंदोलन केल्यानंतर समाजकल्याण सभापती जयपाल बोदडे, जि. प. सदस्य नंदकिशोर महाजन, अमित देशमुख यांनी चर्चा करीत शिक्षणाधिकाऱ्यांशी फोनवर बोलून तत्काळ पगार करण्याबाबत सूचना दिल्या. गेल्या दीड-दोन महिन्यांपूर्वी शाळेच्या मुख्याध्यापकांसह दहा संशयित शिक्षकांवर बेकायदेशीर रद्दी विकल्याप्रकरणी जामनेर पोलिसांत गुन्हा दाखल झाला होता. तेव्हापासूनच शाळेच्या मुख्याध्यापकपदाला संबंधित शिक्षण विभागाने मान्यता दिली नाही. परिणामी शिक्षक-शिक्षकेतर कर्मचाऱ्यांची दोन महिन्यांची पगार बिले वित्त विभागाकडे पाठविण्यास अडचण निर्माण झाली आहे.
यामुळे दोन दिवसांत निर्णय न झाल्यास 5 मार्चला ठिय्या आंदोलन व 7 मार्चपासून शालेय कामकाजावर बहिष्कार टाकण्याचा इशारा दिला. निवेदन देतेप्रसंगी ज्योत्स्ना विसपुते, कपिल शर्मा, आर. पी. कुळकर्णी, यू. एम. माळी, सुरेश सुरवाडे, अशोक पाचपोळ, आर. एस. ठाकूर, आर. डी. येवले, आर. एस. ठोसरे, पी. एम. पाटील अर्चना ठाकरे, जे. एस. राठोड आदी उपस्थित होते.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.