जळगाव  : महात्मा जोतिराव फुले शेतकरी कर्जमुक्ती योजना 2019 अंतर्गत आज हिंगोणे (ता. यावल) व कराडी (ता. पारोळा) येथे 142 शेतकऱ्यांच्या कर्जमाफीची सुमारे 1 कोटी 8 लाख 66 हजार 728 रूपयांची रक्कम आज सायंकाळी जिल्हा बॅंकेकडे "एनईएफटी'द्वारे आला आहे. उद्या (ता.27)जिल्हा बॅंकेकडून संबंधित विका सोसायटीतून शेतकऱ्यांच्या खात्यात जमा करण्यात येणार आहे, अशी माहिती जिल्हा उपनिबंधक कार्यालयाच्या सूत्रांनी दिली. 

नक्की वाचा :  जिल्ह्यात सोळाशेवर शेतकऱ्यांच्या आत्महत्या 
 

या कर्जमाफीत हिंगोणा येथील 76 शेतकऱ्यांचे 54 लाख 86 हजार 554 तर कराडी येथील 66 शेतकऱ्यांचे 33 लाख 80 हजार 174 असे एकूण 142 शेतकऱ्यांचे 1 कोटी 8 लाख 66 हजार 728 एवढी आली आहे. या दोन्ही गावातील उर्वरित शेतकऱ्यांनाही लवकरच कर्जमाफीची रक्कम मिळणार आहे. गेल्या तीन दिवसांपासून कर्जमाफीसाठी वरील दोन्ही गावांमध्ये शेतकरी आधार प्रमाणीकरणाची सुरू आहे. आज तिसऱ्या दिवसांपर्यंत 205 शेतकऱ्यांपैकी 195 शेतकऱ्यांचे प्रमाणीकरण पूर्ण झाले आहे. उर्वरित दहा शेतकऱ्यांचे प्रमाणीकरण उद्या पूर्ण होईल. आतापर्यंत कर्जमुक्ती योजनेत 1 लाख 73 हजार शेतकऱ्यांची माहिती अपलोड करण्यात आली आहे. 

क्‍लिक कराः   कुटूंबीय लग्नाच्या तयारीत...तेवढ्यात पडला छापा ! 
 

एकूण 1 लाख 51 हजार 200 खात्यापैकी अपलोड केलेल्या कर्जखात्यांपैकी यशस्वीरीत्या पोर्टलवर सबमीट झालेल्या कर्ज खात्यांची संख्या 1 लाख 49 हजार 896 असल्याची माहिती उपनिबंधक मेघराज राठोड यांनी दिली. याशिवाय जिल्ह्यातील 2 लाख 10 हजार 677 शेतकऱ्यांचे कर्ज खाते आधार क्रमांकाशी संलग्न झाले आहेत. 

आर्वजून पहा : ऑनलाइनमुळे "सेवायोजन'ची नावनोंदणी झाली सुकर 
 

जिल्ह्याला मिळणार 
1104 कोटींची कर्जमुक्ती 
जिल्ह्यात जिल्हा बॅंकेच्या शेतकरी सभासदांना एकूण 783 कोटी 45 लाखांची कर्जमुक्ती, तर राष्ट्रीयकृत बॅंकेच्या शेतकरी सभासदांना 321 कोटींची अशी जिल्ह्यात एकूण 1104 कोटींची कर्जमुक्ती मिळणार आहे. 
जिल्ह्यातील सर्वच पात्र शेतकऱ्यांची अंतिम यादी येत्या 28 फेब्रुवारीस शासनातर्फे जाहीर होणार आहे.