नाशिक : मुंबई आयआयटी यांच्याकडील कुपोषण व स्तनपानविषयक उपक्रमाकरिता जिल्हा परिषदेच्या महिला व बालकल्याण विभागांतर्गत निवडलेल्या अधिकारी व कर्मचारी यांच्या झालेल्या पूर्वपरीक्षेला (प्री-टेस्ट) चांगला प्रतिसाद मिळाला आहे.

पात्र ठरलेल्या दोन हजार ४०२ कर्मचाऱ्यांपैकी तब्बल दोन हजार ३६२ अधिकारी-कर्मचारी यांनी ही परीक्षा दिली आहे. पहिल्या टप्प्यातील प्री-टेस्ट झाल्यानंतर या परीक्षार्थींची येत्या ७, ८ फेब्रुवारीला पुन्हा परीक्षा होईल. यातून २५० अधिकारी-कर्मचारी यांची निवड केली जाणार आहे. (2362 ZP employees of district give Pre Test Nashik News)

जिल्हा परिषदेच्या मुख्य कार्यकारी अधिकारी आशिमा मित्तल यांच्या संकल्पनेतून बालकांचे कुपोषण व स्तनपानविषयक महत्त्वाकांक्षी उपक्रम जिल्ह्यात राबविण्यात येणार आहे. या उपक्रमाद्वारे एकात्मिक बालविकास सेवा योजना व आरोग्य विभाग, जिल्हा परिषद यांमधून २५० प्रशिक्षकांची निवड करण्यात येऊन त्यांचे ३ महिन्यांकरिता गावपातळीवरील प्रशिक्षण घेण्यात येणार आहे.

या २५० प्रशिक्षकांमधून ५० मुख्य प्रशिक्षकांची निवड करण्यात येणार आहे. यात आशासेविका, सेवक, पर्यवेक्षिका, एनआरएचएम, तालुका वैद्यकीय अधिकारी, वैद्यकीय अधिकारी आदींचा समावेश आहे.

हेही वाचा : भारतीय क्रिकेटची नवी आशा- पृथ्वी शाॅ

या उपक्रमाच्या अनुषंगाने तयार करण्यात आलेल्या सेफ ॲपद्वारे निवड झालेल्या दोन हजार ५०० परीक्षार्थींची गत आठवड्यात परीक्षा झाली. उमेदवारांना व्हिडिओच्या माध्यमातून अभ्यासक्रम देण्यात आला होता. ४० उमेदवार गैरहजर राहिले.

तालुकानिहाय परीक्षार्थी

बागलाण (२१७), चांदवड (१०८), देवळा (११४), दिंडोरी (२१०), इगतपुरी (१५१), कळवण (१३०), मालेगाव (१५८), नांदगाव (११३), नाशिक (१३०), निफाड (२२०), पेठ (१८६), सिन्नर (११८), सुरगाणा (१६९), त्र्यंबकेश्वर (१२६), येवला (२१२).