नाशिक : जिल्ह्या‍त नव्‍याने आढळणाऱ्या कोरोना बाधितांची संख्या पाचशेच्‍या आत असल्‍याने रुग्ण संख्येत संथ गतीने वाढ होत आहे. गुरूवारी (ता.२२) दिवसभरात ४३० कोरोना बाधित आढळून आले. ४३५ रुग्णांनी कोरोनावर मात केली असून, चार रुग्णांचा मृत्‍यू झाला. यातून जिल्ह्यातील ॲक्‍टीव्‍ह रुग्ण संख्येत नऊने घट झाली असून, सद्यःस्थितीत ६ हजार ४३१ बाधितांवर उपचार सुरू आहेत. 

गुरूवारी (ता. २२) नव्‍याने आढळलेल्‍या कोरोना बाधितांमध्ये नाशिक शहरातील २६०, नाशिक ग्रामीणचे १५४, मालेगावचे चौदा तर जिल्‍हाबाह्य दोन बाधित आढळून आले. कोरोनामुक्‍त झालेल्‍या रुग्णांमध्ये नाशिक शहरातील २४५, नाशिक ग्रामीणमधील १५१, मालेगावचे १९ तर वीस जिल्हाबाह्य रुग्णांनी कोरोनावर मात केली आहे. नाशिक शहरातील एक, नाशिक ग्रामीणच्‍या तीन रुग्णांचा उपचारादरम्‍यान मृत्‍यू झाला आहे. आत्तापर्यंत जिल्ह्या‍त ९१ हजार ००२ बाधित आढळून आले असून, यापैकी ८२ हजार ९४३ बाधितांनी कोरोनावर मात केली आहे. १ हजार ६२८ रुग्णांचा कोरोनामुळे मृत्‍यू झाला आहे. 

हेही वाचा > क्रूर नियती! नवरात्रीच्या पहिल्याच दिवशी देवीभक्ताचा दुर्देवी अंत; कुटुंबियांचा आक्रोश

दिवसभरात दाखल संशयितांमध्ये नाशिक महापालिका हद्दीतील रुग्णालये व गृहविलगीकरणात ७८४, नाशिक ग्रामीण रुग्णालये व गृहविलगीकरणात ५४, मालेगाव रुग्णालयांत आठ तर डॉ. वसंत पवार वैद्यकीय महाविद्यालयात चार, जिल्‍हा रुग्णालयात दोन रुग्ण दाखल झाले आहेत. सायंकाळी उशिरापर्यंत ५९५ अहवाल प्रलंबित होते. यापैकी २६० अहवाल नाशिक ग्रामीण तर २२८ अहवाल नाशिक महापालिका हद्दीतील रुग्णांचे आहेत. 

हेही वाचा >  मध्यरात्रीस खेळ चाले! गायींना भुलीचे औषध देऊन तस्करी; महागड्या गाड्यांचा वापर