नाशिक / सिडको : वडील वारल्याचे दुःख...त्यात दशक्रियेला जायची इच्छा लेकीची राहूनच गेली. कारण नियतीचा फासा असा उलटा पडला की लेकीलाच वडिलांकडे कायमचा घेऊन गेला. दशक्रियेसाठी जात असताना पुन्हा एकदा कुटुंबीयांना मुलीच्या मृत्यूची बातमी आल्याने महाजन कुटुंबीयांवर दुःखाचा डोंगर कोसळला.

असा घडला प्रकार

वडिलांच्या दशक्रिया विधीसाठी जाणाऱ्या सिडकोतील महिलेचा रविवारी (ता. १०) ट्रकच्या चाकाखाली सापडून मृत्यू झाला. येथील उत्तमनगर, श्रीराम मंदिर चौकात राहणाऱ्या रत्नाबाई प्रवीण महाजन (वय ३७) पती प्रवीण महाजन यांच्यासमवेत चोपड्याजवळील अडावद येथे वडील पांडुरंग महाजन यांच्या दशक्रियेसाठी दुचाकीवरून जात होत्या. गावापासून आठ ते दहा किलोमीटर अंतरावर चोपडा रोडवर गतिरोधकावर त्यांची दुचाकी जोरात उडाली व त्या रस्त्यावर पडल्या. याच क्षणी मागून येणाऱ्या ट्रकचे चाक त्यांच्या अंगावरून गेले. त्यात रत्नाबाई महाजन यांचा जागीच मृत्यू झाला. प्रवीण महाजन बाजूला पडल्याने ते वाचले. वडील वारल्याचे दुःख सोबत घेऊन त्यांच्या दशक्रियेसाठी जात असताना पुन्हा एकदा कुटुंबीयांना मुलीच्या मृत्यूची बातमी आल्याने महाजन कुटुंबीयांवर दुःखाचा डोंगर कोसळला.

हेही वाचा - थरारक! नांदगाव हत्याकांडाने जाग्या केल्या सुपडू पाटील हत्याकांडच्या स्मृती..आजही ग्रामस्थांमध्ये संतप्त भावना

घटनेने हळहळ व्यक्त

रत्नाबाई महाजन यांच्या मागे पती, मुलगा व मुलगी असा परिवार असून, मुलगी नुकतीच दहावीत चांगल्या गुणांनी उत्तीर्ण झाली, तर मुलगा नववीत शिकत आहे. या घटनेने सिडको भागात हळहळ व्यक्त होत आहे. 

हेही वाचा > नांदगाव हादरले...एकाच कुटुंबातील सर्वांची निघृण हत्या; मोठी खळबळ

संपादन - ज्योती देवरे