पिंपळगांव बसवंत (जि. नाशिक) : मोदक व नैवेद्याचे पदार्थ तयार करण्यासटी हातखंडा असावा लागतो. ठरावीक महिलांनाच ते जमत असल्याने तयार नैवेद्यावर भाविक भर देत आहेत. नैवेद्याच्या पदार्थासाठी पिंपळगाव शहरातील स्वीट मार्टमध्ये ग्राहकांची गर्दी दिसत आहे.

सार्वजनिक गणेशोत्सव मंडळाकडून तयार नैवेद्याला वाढती मागणी असल्याचे चित्र आहे. मोदक पेढ्याचे दर ६०० रुपये किलो, तर लाडू २०० रुपये किलो आहेत. (Modak Ladu Demand ready made prasad for Ganesha in Pimpalgaon Baswant Nashik Latest Marathi News)

विघ्नहर्त्या गणरायाच्या स्वागतानंतर पिंपळगाव शहरात घरगुतीसह सार्वजनिक गणेशोत्सव मंडळांनी विविध कार्यक्रम होत आहेत. आकर्षक रोषणाईवर भर दिला आहे. उत्सवाच्या पाश्‍र्वभूमीवर गणेशाच्या नैवेद्य खरेदीलाही वेग आला आहे. यंदा मलई बर्फी, मोतीचूर लाडू, मॅंगो मोदक, पिस्ता मोदक, बुंदी लाडुचे मोदक, अशा नानाविध नैवेद्याच्या पदार्थांची रेलचेल पिंपळगावमध्ये दिसत आहे.

नैवेद्यासाठी मोदकांसह खव्याचे पेढे, गोड बुंदी, काजू बर्फी, मलई करंजी, चॉकलेट मोदकासह अनेक नवीन पदार्थ बाजारात दाखल झाले आहेत. सार्वजनिक मंडळासह घरगुती आरतीला मान मिळालेले दांपत्य तयार प्रसाद घेऊन जात आहेत. त्यामुळे गणेशोत्सव काळात नैवेद्य पदार्थ विक्रीची उलाढाल वाढली असल्याचे सागर सम्राटचे संचालक मोहनलाल चौधरी यांनी सांगितले.

दहा वर्षांपूर्वी नैवेद्यासाठी लागणारे मोदक व अन्य पदार्थ घरीच बनविले जात होते, पण आता प्रत्येकाला वेळ अपुरा पडत असल्याने तयार नैवेद्य खरेदी करण्याकडे सर्वांचा ओढा सुरू आहे. तयार मोदकाचा ट्रेंड वाढला आहे.