सटाणा : विठेवाडी (लोहणेर, ता.देवळा) येथील वसंतदादा सहकारी साखर कारखाना प्रशासनाने सेवानिवृत्त कर्मचाऱ्यांची थकीत देणी तत्काळ अदा करावी, अशी आग्रही मागणी निवृत्त कामगार युनियनतर्फे धाराशिव प्रशासनाकडे केली आहे.

मागील पाच वर्षापासून वसंतदादा सहकारी साखर कारखाना पंढरपूर येथील धाराशिव साखर कारखाना प्रशासनाने भाडेतत्वावर चालविणेसाठी घेतला आहे. त्यावेळी एमएससी बँकेच्या व कामगार युनियनच्या करारानुसार धाराशिव कारखान्याने सेवानिवृत्त कर्मचार्‍यांचे पीएफ, पेन्शन, पगार व इतर देणे आदी बाबी पूर्ण करणे आवश्यक होते.

परंतु प्रशासनाने याबाबत अद्यापही कोणतीही प्रकारची कार्यवाही केलेली नाही. त्यामुळे येथील कर्मचाऱ्यांचे पीएफ, पेन्शन व पगार मिळत न झाल्याने या कामगारांवर उपासमारीची वेळी आली आहे.

हेही वाचा: प्राप्तिकर उत्पन्न सवलत मर्यादा वाढणार?

यासंदर्भात सेवानिवृत्त कामगार युनियनने धाराशिव प्रशासनाची भेट घेऊन वेळोवेळी पत्रव्यवहारही केला आहे. मात्र धाराशिव प्रशासनाने निवृत्त कर्मचाऱ्‍यांच्या मागणीकडे सातत्याने दुर्लक्ष करीत आहे. त्यामुळे वसाकाच्या निवृत्त कामगार आर्थिक संकटात सापडला असून संतापाची भावना निर्माण झालीय आहे.

याबाबत युनियनचे सरचिटणीस रवींद्र सावकार, हिरामण बिरारी, विलास सोनवणे आदींनी कारखाना कार्यस्थळावर सेवानिवृत्त कर्मचाऱ्यांची बैठक घेतली. बैठकीस जवळपास २०० निवृत्त कामगार उपस्थित होते.

बैठकीत कामगारांना मागण्यांबाबत सविस्तर माहिती देण्यात आली. यानंतर सर्व कामगारांनी धाराशिव कारखान्याचे कार्यकारी संचालक अमर पाटील व संचालकांशी चर्चा करून मागण्यांचे निवेदन दिले. श्री.पाटील यांनी आमदार राहुल आहेर व धाराशिवचे अध्यक्ष अभिजित पाटील यांच्याशी चर्चा करून सकारात्मक तोडगा काढण्याचे आश्वासन दिले.

यावेळी रवींद्र सावकार, हिरामण बिरारी, विलास सोनवणे, सतीश शिरोडे, अरविंद सोनवणे, अशोक देवरे, प्रताप सोनवणे, प्रताप देवरे, शांताराम निकम, सुभाष पवार, कुबेर जाधव, व्यंकट पवार आदींसह कामगार उपस्थित होते.