ZP Employees Transfer : जिल्हा परिषदेतील नियमित बदली प्रक्रीया सुरू होण्याअगोदरच रातोरात विभागातून झालेल्या बदल्या वादात सापडण्याची शक्यता आहे. रातोरात झालेल्या या कर्मचारी बदल्यांमध्ये दाखल झालेल्या प्रमाणपत्राबाबत तक्रारी झाल्याने या प्रमाणपत्राची चौकशी सुरू झाली आहे.

चौकशीत प्रमाणपत्र बोगस आढळल्यास सर्व बदल्या रद्द करून दोषींवर कारवाई करणार असल्याचे जिल्हा आरोग्य अधिकारी डॉ. हर्षल नेहते यांनी सांगितले. (ZP Controversy over health department transfers Investigation of 9 certificates filed underway Nashik News)

गत आठवड्यात जिल्हा परिषदेतील आरोग्य विभागातील कर्मचारी बदल्यांची कारवाई होण्यापूर्वी विभागाकडून कर्मचाऱ्यांच्या विनंती बदल्या करण्यात आल्या. अगदी रातोरात डझनभर बदल्या करण्यात आल्या आहेत.

या सर्व विनंती बदल्या असून यात कर्मचाऱ्यांनी वैद्यकीय प्रमाणपत्र, घटस्फोट, विधवा प्रमाणपत्र जोडले आहेत. प्रामुख्याने या बदल्यांमध्ये कर्मचाऱ्यांना नाशिक तालुक्यातच पदस्थापना देण्यात आलेली आहे.

सदर तालुक्यातील सर्वच जागा भरत, इतर आरोग्य केंद्रामधील जागा रिक्त ठेवण्यात आल्या आहेत. यासह दाखल झालेल्या प्रमाणपत्राबाबत मोठ्या तक्रारी आरोग्य विभागाकडे प्राप्त झाल्या आहेत. तसेच यातील अनेक बदल्या सोईने करून घेतल्याचा आरोप विभागातीलच कर्मचाऱ्यांनी केला.

हेही वाचा : Credit Card फसवणूक....काय घ्याल काळजी?

त्यामुळे आरोग्य विभागातील रातोरात झालेल्या बदल्या वादाच्या भोवऱ्यात सापडल्या. वाढत्या तक्रारींची दखल घत मुख्यकार्यकारी अधिकारी आशिमा मित्तल यांनी सर्व बदल्यांकरिता दाखल झालेल्या प्रमाणपत्रांची चौकशी करण्याचे आदेश जिल्हा आरोग्य अधिकारी यांना दिले.

त्यानुसार या रातोरात झालेल्या बदल्यांची चौकशी विभागाकडून सुरू असून कागदपत्रांची पडताळणी करण्याचे काम सुरू असल्याचे बोलले जात आहे. तसेच यासाठी कर्मचाऱ्यांनी दाखल केलेल्या ९ हून अधिक वैद्यकीय प्रमाणपत्रांची चौकशी करण्यासाठी सदर प्रमाणपत्र पाठविण्यात आले आहे.

प्रमाणपत्रांची पडताळणी होऊन अहवाल आठवडाभरात दाखल होण्याची शक्यता आहे. यात प्रमाणपत्र बोगस असल्याचे निर्दशनास आल्यास थेट बदल्या रद्द करून कारवाई केली जाणार असल्याचे डॉ. नेहते यांनी सांगितले.